Саранскыште (Мордовий) финн-угор да самодий калык-влакын шочмо йылмышт дене возымо «Мемнан тукым» («Наше поколение») почеламут да ойлымаш конкурс иктешлалтын. 9 декабрьыште тыгаяк лӱман книга презентаций эртаралтын. Тушто Марий Эл гыч самырык возышо-влак Алёна Яковлева, Виктория Михайлова (Матвеева) да Мария Гринчук лийыныт.
Российысе финн-угор калык-влакын ассоциацийыштын увертарыме ты конкурсыш Российысе 21 регион гыч 153 йодмаш пурен, произведений-влак 15 йылме дене возымо улыт: саам (кильдинский диалект), мордва (мокша да эрзя), марий (олыкмарий да курыкмарий), водь, ижор, вепс, финн, коми-пермяк, ненец, эстон, удмурт, коми, карел да хант (казымский диалект). Тӱрлӧ кундемла гыч улшо 13 еҥан эксперт комиссийын ойырен налме эн сай произведений-влакым книгашке кок йылме дене пуртымо: шочмо йылмышт дене да рушлашке кусарымым. Книган тиражше – 1600 экземпляр.
Марий Эл гыч Ална Алкечын, Зинаида Васяткинан, Карина Ватютован, Любовь Веденькинан, Зоя Дудинан, Мария Гринчукын, Дарья Ермолаеван, Ирина Кугергинан, Татьяна Лапинан, Игорь Поповын, Геннадий Сабанцевын, Владимир Матвеевын, Виктория Михайлован, Любовь Никитинан, Анатолий Тимиркаевын, Алёна Яковлеван да Свердловск область гыч Валерий Михайлован сылнымут саскашт пуреныт.
Сеҥыше-влакым тыге палемденыт:
«Шочмо йылме – мыйын илышыштем» номинаций: 1-ше вер – Лидия Некрасова (Удмуртий) ден Людмила Ломшина (Мордовий); 2-шо вер – Любовь Ерофеева (Коми Республик), 3-шо вер – Прасковья Торопова (Ямал-Ненецк автономный округ).
«Мыйын калыкем» номинаций: 1-ше вер – Геннадий Сабанцев (Марий Эл), 2-шо вер – Сергей Яковлев (Карелий), 3-шо вер – Анастасия Королева (Мурманск область).
«Элнан калыкше-влак – ик еш» номинаций: 1-ше вер – Раиса Орлова (Мордовий), 2-шо вер – Ольга Иванова (Удмуртий), 3-шо вер – Владимир Матвеев (Марий Эл).
Икымше верым налше-влаклан планшетым, кокымшо верлан Маруся йӱк полышкалышан ушан колонко, а кумшо верлан колонкан караоке-микрофоным пуэныт. Марий Эл калык поэтна Г. Сабанцевлан (Ояр) дипломым да пӧлекым Тиште кечын Марий Эл правительстве вуйлатышын икымше алмаштышыже Михаил Васютин кучыктен. Кажне участниклан сертификатым да «Новое поколение» книгам колтат.
Л.СЕМЕНОВА
Фотом АФУН-ын сайтше гыч налме
