Регион вуйлатыше Юрий Зайцев Марий Элыште правопорядкым ыштыме шотышто координационный совещанийым эртарен.
Мероприятийыште Кугыжаныш Погын председатель Михаил Васютин, Марий Элыште тӱҥ федеральный инспектор Сергей Беляков, кучемын федеральный да региональный органышт-влакын вуйлатышышт лийыныт.
Совещанийыште йотэлла гыч студент-влаклан регион кумдыкышто террористический, экстремистский да закон дене келшыдыме моло пашашке ушнымышт ваштареш, национальный проект-влакым илышыш пуртымо годым правам пудыртымо деч аралыше мере-влакым ыштыме йодыш-влакым каҥашеныт.
Погынышо-влаклан Юрий Зайцев ушештарен: Россий Федерацийын Президентшын 2025 ий 15 октябрьысе указше дене 2026-2030 ийлалан миграционный политике концепций пеҥгыдемдалтын. Тудо мигрант-влак толмым шотыш кондымо у механизмым да легально пашам ышташ пурымым палемда.
Тыгак регион вуйлатыше национальный да федеральный проект-влакым илышыш пуртымо годым правонарушенийым ыштыме ваштареш виктаралтше мере-влакым каҥашыме жапыште республикын социально-экономический вияҥмашыжлан федеральный полышын кӱлешлыкшым палемден.
– Нацпроект-влак – тиде Марий Элыште у йочасад, поликлинике, школ, корно ышталтыт, кумдык-влак тӱзатыме лийыт манмым пеҥгыдемдымаш. Кажне теҥге пайдалын кучылталтшаш, а проект-влак кӱлеш семын да жапыштыже шукталтшаш улыт, – каласен республик вуйлатыше.
Контракт-влак дене пашам ыштыме годым тӱҥалтыш гыч илышыш пуртымо марте тӱткылыкым ончыктен пашам ыштымылан Юрий Зайцев правам аралыше да эскерыше орган-влаклан тауштен.
Марий Эл вуйлатышын пресс-службыжын уверже негызеш Любовь Камалетдинова ямдылен.
