Республикыште Марий Эл Образований да науко министерствын Общественный советше пелен чумырымо Ача-ава-влакын общественный контроль шотышто регионысо штабшын пашаже умбакыже шуйна. 26 апрельыште тудын еҥже-влак ведомствын министрже Л.Ревуцкая дене пырля Йошкар-Оласе 14-ше №-ан гимназийыште йоча-влаклан шокшо кочкышым пукшымо дене кылдалтше сомылым тергеныт.
«Тунемше-шамычлан шокшо кочкышым пукшымо шотышто процесс республикысе чыла школлаште санитарный нормо да правил дене келшышын илышыш пурталтеш. Кызыт тунемме верласе столовыйлаште чылаже 73107 йоча кочкеш. Кажне тылзын эртарыме тергымаш почеш ты паша чыла тунемше гыч 88,7 процентшым авалтен», – каласен Лариса Ревуцкая.
Ача-ава-влакын общественный контроль штабыштын еҥже-влак гимназийысе столовыйышто менюжым, кочкышым ямдылыме технологийжым, температур режимым шотыш налмым тергеныт. Тиде жапыште лачак 5-ше классыште тунемше-влак эр кочкышым ыштеныт. Нунын мутышт почеш, кочкыш юалге огыл, тудым тутлым ямдылат.
Тергыше-влак гимназийысе столовыйын пашажым сай могырым акленыт. «Менюлан да кочкышлан вуйым шийше ача-ава-влаклан тунемме верыш мияш, йоча пелен шинчаш да кочкышым тамлен ончаш темлем. Тидын деч вара нуно тидын шотышто удам ойлаш огыт тошт, шонем», – каласен штабын председательже М.Шавкунова.
Г.Кожевникова
(Фотом Марий Эл Образований да науко министерстве гыч налме.)
