Михаил СКОБЕЛЕВ
Фотосымыктышым негызлышылан шотлат
7 ноябрьыште Йошкар-Олаште «Башне» тӱвыра да выставке рӱдерыште «Заморозка 3.0» проект шке пашажым тӱҥалын.
Ончерыште Валерий Воецкийын фотографийже ден инсталляцийжым, искусствовед Людмила Кувшинскаян коллекцийжым, молынат пашаштым ужаш лиеш.
Выставкыште кугу верым шукерте огыл ты тӱням коден кайыше уста фотограф Валерий Воецкийын экспозицийже налеш. Тудым республикысе фотосӱретче-шамыч шке туныктышыштлан шотлат. Ончерыш Валерий Георгиевичын фотоаппаратшым, юмоҥажым, арт-объектшым погымо. Тыгак тудын чумырымо «Факт» творческий группыжын фотографийже-влакым ужаш лиеш. Нуным Евгений Лихошерст войзен.
Ончерым почмо годым рӱдерын кураторжо Александра Белоусова ден Россий фотосӱретче ушемын регионысо пӧлкажым вуйлатыше Алексей Орлов Марий Элыште фотографийын сымыктыш семын вияҥмаштыже Воецкийын рольжо нерген каласкаленыт. Ачаж нерген шуко поро мутым Инна ӱдыржӧ ойлен.
Валерий Георгиевич шуко шӧрынан айдеме лийын. Тудо «Контакт» заводышто инженерлан ыштен, Марий кугыжаныш университетыште общественный профессий факультетыште (ФОП) фотокружокым вуйлатен, джаз-бандыште барабан дене шоктен, баскетбол дене модын.
Воецкийын арт-объектше-влак поснак ойыртемалтше улыт. Нуно шонкалаш таратат. Юрино велне погымо юмоҥаже-влак чоным тарватат. Мыланем «Почаевская Божья Матерь» юмоҥа поснак келшыш. Тудын воктене шогымо годым чонлан моткоч ласкан чучо.
Ончерыште Воецкийын йӱкшым интерактивный оҥа полшымо дене колаш лиеш. Тудо тушто сымыктышын историйже, фотографий пашалан шӱмаҥмыж нерген каласкала. Ончер 2027 ий 28 февраль марте пашам ышта.
Снимкылаште: 2009- Валерий Воецкий Евгений Лихошерстын фотожо.




