«Ава» деч шерге мут тӱняште уло мо? Уке, очыни, вет кажне айдемылан илышым ава пӧлекла. Санденак, авам моктен, поэт, писатель, композитор, мурызо-влак чапле почеламутым, оҥай ойлымашым, повестьым возат, сылне деч сылне мурым мурат.
Шыже тылзын пытартыш рушарняже Российысе ава-влаклан пӧлеклалтын. Тидын вашеш 24 ноябрьыште Национальный президент искусство школышто «Авам дене пырля» йоча творчестве конкурс икымше гана эртыш. Тудым Республикын Тӱвыра, печать да калык-влакын пашашт шотышто министерствын полшымыж дене Марий тӱвыра рӱдер дене пырля «Саскавий» марий ӱдырамаш ушем эртарыш.
Залыш погынышо-влакым Тӱвыра, печать да калык-влакын пашашт шотышто министрын алмаштышыже Галина Ширяева, Марий тӱвыра рӱдер вуйлатыше Наталья Пушкина, оньыжа Эдуард Александров Аван кечыж дене саламлышт да поро тыланымашым ойлышт.
Конкурсыш Медведево районысо Ельняги ял гыч Роза Васильева ден Мария, Оршанке районысо Кугунур гыч Наталья Богданова ден Ксения, Ирина Кудрявцева ден Анастасия, Морко посёлко гыч Инна Алексеева ден Анна, У Торъял посёлко гыч Светлана Еросланова ден Анна, Провой кундем Эҥервож ял гыч Алёна Толстова ден Полина ӱдырышт, Альбина Тойшева Артём эргыж дене ушненыт.
Икымше конкурс «Мыйын авам» маналтын. Икшыве-влак почеламут, муро, видеослайд полшымо дене авашт дене палдарышт, гармонь, тӱмыр почешат тавалтышт. А теве Ксения Богданова чылалан туштым туштыш:
Кече гае ырыкта,
Кече гае шыргыжеш,
Мый денем эре модеш,
Книгамат эре лудеш…
Эр-эрдене кынелеш,
Писын клубыш ошкылеш.
Кас шуэш адак вашка,
Мом ыштет — тыгай паша.
А Артём Тойшев, шке аважым кече дене таҥастарен, пырысигыжлан каласкалыш.
Тиддеч вара ава ден шочшыжо-влак пеледыш аршашым сӱретлышт. Залыште шинчыше-влаклан нуным эскераш моткоч оҥай ыле.
Кумшо конкурс участник-влакын пашаче, аваштын эн кугу полышкалыше улмыштым ужаш йӧным ыштыш. Нуно, ончылшовычым ӱшталын, кидшокшым кергалтен, подкогыльым тӱрлышт. Эх, эше кочкын ончалаш ыле, шоналтышым мыят верыштем да шӱвылвӱдымак нелын колтышым.
Илышыште кеч-могай туткарыш логалмеке, кугыеҥ веле огыл, йоча-шамычат парням когартыме, йӱлалтыме, кидым-йолым тугымо, чот кылмыктыме, вуйым кече перыме годым икымше полышым пуэн моштымо мастарлыкым ончыктышт.
«Авам дене пырля йытыран ошкылына» конкурсышто йоча-влак авашт дене пырля марий тувырым чиен, сценыште ковыртатен ошкыльыч. Лач тыгайже икшыве-шамычым марий тӱвыралан, йӱлалан кумылаҥда.
Мӧҥгысӧ паша — ты мероприятийын ик эн волгыдо татше. Тыгодым йоча-влак эшеат чот почылтыч да мурен, куштен моштымо мастарлыкыштым ончыктышт. Теве, мутлан, Провой кундем гыч толшо ава ден ӱдыржӧ мультфильмысыла Маша ден Маска лийын лектыч. Кум ияш Полина Маша гаяк сылнын куштымыж дене шокшо кидсовышым сулыш.
Икманаш, тыгай конкурс ава ден икшыве коклаште кылым саемдаш, йоча-влаклан сценыш лекташ, нунылан икымше гана мастарлыкым ончыкташ йӧным ыштыш. Йоча-влак конкурслан моткоч сайын ямдылалтыныт, эсогыл залыште шинчыше ава-влак шерге мутым колын, шинчавӱдым ӱштын шинчышт. Ава — тӱняште эн шерге, эн ӱшанле, эн йӧратыме айдеме. Сандене Ава нерген нимучашдымын шуко ойлаш лиеш.
Сеҥыше-влак тыгай номинацийыште палемдалтыч:
«Икымше полыш» – Светлана Еросланова ден Анна ӱдыржӧ;
— «Этномодо» — Альбина Тойшева ден Артём эргыже
— «Пырля сӱретлена» – Роза Васильева ден Мария ӱдыржӧ;
— «Авай дене пырля» – Наталья Богданова ден Ксения ӱдыржӧ;
— «Пырля ыштена» – Инна Алексеева ден Анна ӱдыржӧ;
— «Мыйын авам» — Ирина Кудрявцева ден Анастасия ӱдыржӧ;
Эн изи участник семын Полина Толстова палемдалтын.
Алевтина Байкова.
М.Скобелевын фотожо.
