У ий салам:Шернур
Тений игече шошо ага годымат, уржа-сорла пагытыштат сай шогыш, сандене чыла пашам жапыштыже да уто роскот деч посна ыштен шуктышна. Шурнат сайын шочо – ӱмашсе деч шагал огыл поген нална. Кормам ончычсо деч шукыракат шапашлышна. Шӧр лӱштышат изи огыл.
Икте гына кумылым волта: сай лектышан шурным ончен кушташ тыршена, а тудым ынде кокымшо ий налше уке. Тыште санкцийынат влиянийже уло докан. Ончыкылан ӱшаным огына йомдаре гынат, вашталтышым ыштыде ок лий. Очыни, шудылан тӱткышым утларак ойыраш перна. Шӧр лӱштышым кугемдыме гына тыгайыште утарен сеҥа.
Ме ончычшат пырчым ӧрдыжкӧ шукыжак ужален огынал. Утларакше озанлыкын вольыкшылан каен да шке озанлыкым кучышо-влаклан ужалыме. Уржа-сорлаште тыршыше комбайнер ден водитель, озанлыкын специалистше ден вольык ончышо-влаклан ярат пуэна. Самырык вольыкым тӱрыс арален кодышо вольык ончышо-влаклан изирак презым яра ойырена. Нуно мӧҥгыштыштат вольыкым ончен кертышт, шонена.
Шкенан пашаеҥна-влаклан эреак тӱткышым ойыренна да ойырена. Паша кумылышт ынже воло, лектышым кугемдышаш верч тыршышт, улан илышт да таза лийышт! Тидымак нунылан У ий вашеш тыланем.
В.Л.СМОЛЕНЦЕВ,
«Восход» СПК колхозын председательже
