24 январьыште Марий Элым вуйлатыше Александр Евстифеев «122» службын калыклан у коронавирус инфекций шарлыме пагытыште жапым шуйкалыде полшымо пашаж шотышто совещанийым эртарен.
«122» службо тазалык аралтыш, врачын консультацийже, COVID-19 деч вакцинацийыш возалтме дене кылдалтше йодыш-влакым лончыла. Тиде номерыш суткаште 100 утла еҥ йыҥгырта.
– Кызыт гына Россий Федерацийын Минздравше деч серышым нална. Тушто элнан субъектлаштыже калыклан медицине полышым дистанционный консультаций йöн дене пуымо колл-рÿдерлаште оператор-шамычын чотыштым шотлен лукмо методикым темлыме, сандене мемнан денат пашаеҥ-влакым ситараш кÿлеш, – манын А.Евстифеев.
Тазалык аралтыш министр Марина Панькова «122» службо нерген радамлын каласкален. Мутшо почеш, тудын пашаже регионысо Минздрав, Информатизаций да кыл департамент да «Ростелеком» ПАО дене пырля шукталтеш.
Гражданинын «122» номерыш пурышо йыҥгырже йÿкан меню полшымо дене тональный набор гоч кусаралтеш:
• пациентын илыме кундемысе медицине организацийыш (медорганизацийын пашам ыштымыж жапыште);
• вашкеполыш станцийыш;
• Роспотребнадзорын «шокшо линийышкыже»;
• «МИАЦ» ГКУ-ш – эмым ситарыме йодыш дене (паша жапыште).
Айдеме тональный набор дене огеш пайдалане гын, йыҥгыр оператор деке – республикын Тазалык аралтыш министерствышкыже (паша жапыште) – кая, паша кече пытымеке да каныш кечылаште – вашкеполыш станцийын операторжо деке.
– «122» службын пашаеҥже-влак врачын приёмышкыжо возалтме, медикым мöҥгышкö ÿжыктымö, вакцинаций, эмым ситарыме, больничный листым налме йодыш-влакым лончылат. Кызыт тушто кандаш оператор – Йошкар-Оласе 1-ше, 2-шо, 3-шо, 4-ше №-ан поликлинике-влак, «МИАЦ» ГКУ, Марий Элын Тазалык аралтыш министерствыже, Вашкеполыш станций, Роспотребнадзор – пашам ыштат, 25 январь гыч эше 27 операторым, 23 медицине организацийым ушаш палемденна, – увертарен М.Панькова.
Информатизаций да кыл департаментын вуйлатышыже Венедикт Суворовын мутшо почеш, кызыт «122» службылан пашам ышташ технический куат ситышын уло.
Таче кечылан тиде пашаште ситыдымаш лийын огыл, эртыше арнян стресс-тестированийым эртарыме да нагрузко технический йöн-влакын сай улмыштым ончыктен, манын «Ростелеком» ПАО-н директоржо Светлана Пашукова.
Юл кундем кугыжаныш технологический университетын ректоржо Игорь Петухов ден Марий кугыжаныш университетын ректоржын пашажым шуктышо Олег Сидоров «122» службышто оператор-влакын пашашкышт студент-шамычымат ушымо нерген каласкаленыт.
Совещанийыште палемдыме почеш, республикыштына «122» службо деч посна медицине организацийлаште эше «шокшо линийын» телефонжо, колл-рÿдер-влак пашам ыштат, у коронавирус инфекций дене черланыше пациент-влакым дистанционно эскерат.
Марий Эл Республикым вуйлатышын организаций да
аналитике виктемжын уверже негызеш
М.ИВАНОВА ямдылен
