УВЕР ЙОГЫН

Ятыр еҥ тергалтын

Марий Элыште Россий Минздравын Горьковский автомобильный завод дене пырля эртарыме «ВИЧ-лан тест: Экспедиций 2019» акцийже мучашлалтын.

Тестированийын куснылшо пунктшо-влак 6 гыч 9 август марте республикнан иканаште икмыняр площадкыштыже пашам ыштеныт. Тунемаш але пашаш, кевытыш але кафеш ошкылшо-влак брендироватлыме автомашинаш кумылын пуреныт да 15 минут жапыште ВИЧ-лан тергалтыныт.

Акций кышкарыште регионыштына илыше 1100 утла еҥ ВИЧ-статусшым рашемден, ВИЧ/СПИД, черланен кертме лӱдыкшӧ да тидын деч аралалтме йӧн-влак нерген утларак пален налын.

Акцийым эртарыме олалаште первичный звенон специалистше, инфекционист, эпидемиолог-влаклан ВИЧ-инфекцийым рашемдыме шотышто семинар-шамыч лийыныт. Эксперт-влак ВИЧ-инфекцийлан анализым палемдыме годым пациент дене мутланыме да результатым каҥашыме формыла дене палдареныт. Илыш гыч налме ситуацийын примерже негызеш ямдылыме фильмла полшымо дене тест деч ончычсо да тудын деч варасе консультаций йӧным ончыктеныт.  

6 августышто Йошкар-Олаште акцийын марий этапшым официально петырыме. Торжественный мероприятийыште Марий Эл правительстве председательын алмаштышыже И.Дравниеце, тазалыкым аралыме министрын алмаштышыже Т.Бастракова, Роспотребнадзорын Марий Элысе виктемжым вуйлатыше С.Булатова, Йошкар-Ола администраций вуйлатышын алмаштышыже Л.Новоселова, СПИД да инфекциян чер дене кучедалме,  профилактикым эртарыме шотышто республикысе рӱдерын тӱҥ врачше П.Сергеев, Козьмодемьянск межрайонный больницын тӱҥ врачше Н.Сидоров, Волжск оласе больницын тӱҥ врачше Д.Фризин лийыныт.

Илга Дравниеце «ВИЧ-лан тест: Экспедиций 2019» акцийын калыкым ВИЧ-инфекцийын шарлен толмыжо да тудын деч аралалтме дене палдарыше кӱлешан элемент семын палемден. «ВИЧ-инфекций, тудын пижме йӧнжӧ, профилактике – тиде тугай увер, могайым шке тазалыкым аралыше, лишыл еҥ-влак верч азапланыше кажне еҥ палышаш. ВИЧ – инфекциян чер, тудым эмлаш ок лий, но контрольышто кучаш лиеш. Таче Российыште положительный ВИЧ-статус денат шуко да сайын илаш полшышо терапий-влак улыт», – манын тудо.

Татьяна Бастракован мутшо почеш, Марий Элыште эртыше акцийыш шуко еҥ ушнен. «Тестированийын кугу кумдыкым авалтымыж деч посна калыкын ВИЧ/СПИД йодыш, ВИЧ-инфекций дене черланыше-влак шотышто шонымашыже вашталтмым сай велым палемдыман. Акций кышкарыште эртарыме семинарлаште налме шинчымаш полшымо дене черын клиникыже да ВИЧ-инфекцийым жапыштыже диагностироватлыме шотышто кызытсе жаплан келшыше уверат кумдан кучылталташ тӱҥалеш», – манын тудо.

«Марий Эл ВИЧ-инфекций авалтыман регион-влак коклаш ок пуро. Мемнан кундемыште тыгай черле Российысе кокла показатель деч кок пачаш шагал. Тиде – профилактике пашан лектышыже. ВИЧ-лан тестированийым эртыше-влак ий еда шукемын толыт, мутлан, ӱмаште республикысе чумыр еҥ гыч 23 процентше тергалтын», – палемден СПИД-рӱдерын тӱҥ врачше П.Сергеев.

Мероприятий мучаште акцийын организаторжо-влаклан Марий Элын «ВИЧ-лан тест: Экспедиций 2019» акцийыште участвоватлымыжым пеҥгыдемдыме шот дене регионын флагшым кучыктымо. Тылеч вара экспедиций пошкудо Чуваш Республикыш кудалын.

М.ИВАНОВА

Опубликовать в Одноклассники

Добавить комментарий