У ий салам: Медведево район
Шканда ӱшаныза, вуйдам ида саке!
Эртыше идалык тыглай лийын огыл. Кеҥежым кукшо шогымылан кӧра пасушто жапым утларак эртараш, кушкыл сайын атыланыже манын, ешартыш подкормкым пуаш логалын. Лектыш ӱмашсе деч изирак лийын гынат, продукцийын качествыже ӱлыкшемын огыл. Пареҥгат, ковыштат удан огыл атыланеныт. Пареҥгын кокла лектышыже гектар еда 320 центнер лийын гын, ковыштан – 800 центнер наре. Вӱдым шавыде, тыгай лектышыш шумо.
Шушаш ийыште пакчасаскам куштымо кумдыкым кугемдаш огына шоно. Тидыже теве мо дене кылдалтын: ме тӱҥ шотышто еш подряд дене ыштена – ешартыш пашаеҥым муаш йӧсырак лияш тӱҥалын. Санденак вес ийыште производствым изишак автоматизироватлаш шонена. Ковыштам погымо годым транспортёр лентым кучылташ тӱҥалына, тыге куштылгырак да шагал вий дене ышташ лиеш. Пареҥгылан автоматически фасоватлыман да сеткым ургыман сортироватлыше пунктым налаш перна. Тудым комбайн дене погена да вигак контейнерлашке оптена. Да климат-контролян складыш шындена.
Ялозанлыкыште да моло отрасльыште тыршыше чыла еҥым У ий дене саламлем да, мутат уке, эн ончычак тазалыкым тыланем. Шканда ӱшаныза, вуйдам ида саке! Пиалан лийза!
Николай ПАХТЕЕВ,
фермер
Пижма
Юрий1 ИСАКОВ ямдылен
Авторын фотожо
