Тачысе темылан
Тӱлыман автокумдык
Йошкар-Олан рӱдӧ ужашыштыже автомобильым шогыктымо верым шотыш кондаш палемдыме.
Республикнан рӱдолаштыже тиде йодышым тарваташ шукертак жап шуын. Уремыште автомобиль шукемме, тудым кушто шогалташ яра верым кычал кудалыштме да иктаж лукышто шогалтыме дене корно шыгыремеш, газон тошкалтеш, жап арам йомеш, кумыл вола.
Санденак Йошкар-Ола молын тергыме корным ойырен налаш – шыгыр верлаште паша жапыште автомобильым шогыктымо верым тӱлыманым ышташ – келшен. Пошкудо регион-влакын рӱдолашт (Казань, Нижний Новгород, Чебоксар) тыгай системыш 2015-2017 ийлаштак кусненыт. Да тиде йӧн тушто удан огыл кучылталтеш.
Мемнан дене ты йӧнлан эҥерташ шонен пыштыме нерген Йошкар-Ола мэрийыште эртыше пресс-конференцийыште каҥашыме. Тушто мэрын пашажым жаплан шуктышо Антон Трудинов, «Оласе сервис» муниципал казна учрежденийын вуйлатышыже Евгений Коскин да ола погынымашын депутатше Евгений Калинкин лийыныт.
Мэрийын данныйже почеш, оласе Красноармейский уремын Машиностроитель деч Советский урем марте ужашыже кок велымат тӱлыман лиеш. Лишнак Осипенко ден Кремлёвский урем-влакын МарГУ воктенысе ужашыштыштат машинам шогыктымылан тӱлыман. Ола покшелне Сеҥымаш бульварыште Я.Эшпай деч Первомайский урем марте, Первомайский уремыште Курымашлык тул деч Марий Эл правительстве марте, Ленин проспектыште Оболенский-Ноготков площадь тураште тыгак яра шогыкташ ок лий. Успенский урем ден Гагарин проспектыште, Палантай уремыште, М.Шкетан лӱмеш драмтеатр йыр, ПГТУ-н 2-шо корпусшо воктене, Советский уремысе участкылаште, Чарла кремль ден Г.Константинов лӱмеш драмтеатр лишне, Чавайн бульварыште Рӱдӧ парк деч эҥер сер марте – чыла тиде тӱлыман кумдык.
Антон Трудинов каласен: ты проектым илышыш пурташ Йошкар-Олан администрацийже «Оласе сервис» учрежденийым ыштен да «Парковка 12» автоматизироватлыме системым пашаш колтен.
Ончылгоч палемдыме почеш, 15 ноябрь гыч 14 декабрь марте 40 наре турист автобуслан шогалаш ситыше тӱлыман куд вер пашам тӱҥалеш: Ленин площадьыште, Ленин проспектыште, Вознесенский уремыште, Чарла кремль, курчак театр да Г.Константинов лӱмеш драмтеатр лишне.
15 декабрь гыч чыла автоозалан – физический ден юридический лицалан – 31 верыште тыгаяк программе пурталтеш. Нине верыште автотранспортым паша кечын 8 гыч 20 шагат марте шогыктымылан окса налалтеш. Икымше 15 минутлан огыт тӱлыктӧ. Ты жапыште пассажирым волтен але шынден шукташ лиеш.
Кугыжаныш да социальный учреждений-влак тураште але нунын лишне тӱлыктыман вер ок лий.
Тӱлыман верыште автомобильым ик шагат шогыктымылан 50 теҥге налалтеш. Кечаш абонемент 250, тылзаш 5000 теҥгем, а идалыкаш 40 тӱжем теҥгем шогаш тӱҥалеш. Ты кундемысе пӧртыштӧ илыше-влаклан 20 шагат кас гыч 8 шагат эр марте резидент абонемент пуалтеш. Кызытеш ола покшелне ик тыгай верым палемдыме – Чавайн бульварыште. Тыгай абонемент идалыклан 2400 теҥгем шогаш тӱҥалеш.
Кажне тӱлыман верыште оператор тӱлымӧ кугыт да йӧн нерген табличкым вераҥда да шке телефонжым ончыкта. Ты вер дене пайдаланымылан мобильный приложений, операторын сайтше, СМС полшымо дене, банкомат гоч 23 шагатат 59 минут марте тӱлаш лиеш. Погынышо окса ола кӧргысӧ корным саемдаш, кудывечылам тӱзаташ, автомобильым тӱлыде шогыктымо у верым почаш колталтеш.
Юрий ИСАКОВ.
Снимкыште: Евгений Коскин, Антон Трудинов, Евгений Калинкин – пресс-конференций годым.
Юрий Исаковын фотожо.




