Игечылан кӧра Марий Элысе чодыраште пеш вашке тул ылыж керетме лӱдыкшӧ уло. Тидын шотышто регион вуйлатыше Юрий Зайцев муниципал образований вуйлатыше-влак дене совещанийым эртарен.
Тудын лукмо пунчалже почеш, республикыште 5-ше классан пожар лийын кертме лӱдыкшӧ улмым увертарыме. Пӱртӱс поянлык, экологий да йырым- йырысе средам аралыме шотышто министр Алексей Киселевын увертарымыж почеш, тений пожар лийын кертме пагыт тӱҥалтыш гыч республикысе чодыраште 45 гана тул ылыжын. 44-шым вигак йӧртен кертме. Чодыра пожар ваштареш кучедалмаш чыла формирований ямде. Ужар поянлыкнам патрулироватлыме паша чарныде кая.
Юрий Зайцев палемден, верысе кучем орган-влакын кызыт тӱҥ задачышт –пожар-влакын уэш лийын кертмыштым шижтарен, верысе калыклан лӱдыкшӧ лийын кертмым кораҥден толман, а тул ылыжын гын, тудо илыме оралтылаш ынже кусно манын чыла ыштыман. Пожар лийын кертме пагытым туткар деч посна эртарен колташ тыршыманак.
5-ше классан пожар лӱдыкшӧ улмо пагытыште чодыраш транспорт дене пураш, тулым ылыжташ чаралтеш. Законым пудыртышо-влаклан 40 тӱжем деч 50 тӱжем теҥге марте штрафым тӱлыктен кертыт. Чодыраште тул ылыжмым ужында гын, «Авиалесоохранын» диспетчержылан 8 (8362) 56-65-35 але чодыра охранын вияш линийышкыже 8 800 100 94 00 але 112 номер дене йыҥгыртыман.
Светлана Носова
Марий Элын Пӱртӱс поянлык, экологий да йырым-йырысе средам аралыме шотышто министерствыжын соцкыл лаштыкше гыч налме фото.
