Йошкар-Олаште Келшымаш пӧртым чоҥымо паша умбакыже шуйна.
Тудо мартыште тӱҥалын.Тидлан шийвундым РФ Правительстве ойырен. Марий Эл правительствым вуйлатыше Александр Евстифеев тидын дене кылдалтше йодышым элнан премьер-министрже Михаил Мишустин, Юл кундемыште РФ Президентын полномочный преставительже Игорь Комаров дене вашлиймаште нӧлталын. Кодшо ийын РФ Правительстве председатель Келшымаш пӧртым чоҥаш 700 миллион лишке теҥге субсидийым ойырымо нерген порученийыш кидпалыжым пыштен.
Марий Эл вуйлатыше А.Евстифеев чоҥымо паша кузе кайымым ончен савырнен. Келшымаш пӧрт оласе рӱдӧ пазар воктене лиеш. Ты пашам «Казанский посад» ООО шукта. Тудын директоржо Руслан Муталиев Александр Евстифеевым чоҥымо паша кузе кайыме дене палдарен. Тачысе кечылан гидроизоляцийым ыштыме, подвал пырдыжым шокшемдыме. Кызыт монолит леведышым ышташ ямдылалтыт. Лишыл жапыште икымше пачашым нӧлташ тӱналыт. Директор регион вуйлатышым ӱшандарен — пашам жапыштыже мучашлышаш улыт.
— Чылажат график почеш кая. Кок ий жапыште Келшымаш пӧртым чоҥен шуктышаш улына, — каласен Руслан Муталиев.
Тушто офис пӧлем, концерт, куштымо, репетиций, конференций, ончер зал-влак, холл-фое, национальный кочкыш кафе, костюм ден реквизитым, семӱзгарым аралыме пӧлем-влак лийыт.
Александр Евстифеев Келшымаш пӧртын кӱлешлыкшым палемден, вет республикыштына 50 тӱрлӧ калык ила, 32 калыкле-тӱвыра мер ушем шке пашажым ворандара. «Нунылан вашлийын погынаш, тургыжландарыше йодыш-влакым каҥашаш сай вер лиеш. Тений оралтым нӧлтен шуктыман. Вес ийлан кӧргысӧ пашам гына шукташ лийже. Подрядчик тиде задачым шукта манын ӱшанем. Кок ий гыч Келшымаш пӧрт лийын шушаш», — каласен Александр Евстифеев.
Марий Эл Республик вуйлатышын организаций да аналитике виктемжын уверже негызеш С.Носова ямдылен.
