«Гастрономический код Марийского края: наследие предков на вашем столе» книгам ямдылыше-влак материалым чумыраш тӱҥалыныт.
Регионыштына илыше калык-влакын йӱла кочкышыштым чумырышо книгам ямдылыме нерген газетышкына воезенна ыле. Тудын дене кылдалтше проектым илышыш шыҥдарымашке «Теплая речка» трактирын озаже-влак, федеральный гастрономий эксперт Олег Назаров да Марий кугыжаныш университетын шанчызыже-влак ушненыт.
Книгаш руш, олык ден курыкымарий, татар-влакын кочкыш рецептыштым пурташ шонат. Тыгак автор-влакын ончылгоч палемдымышт почеш, савыктышым легенде, миф, тӱрлӧ оҥай историй-влак дене пойдарат.
Книга икмыняр форматан лиеш: икымшыже сувенир сынан, кокымшыжо – тӱшка калыклан да кумшыжо – электрон версий, туштак QR-код ден видеорецепт-влак лийыт.
Книгалан материалым чумырымо амал денак кодшо кечылаште ресторан критик, 10 книган авторжо Олег Назаров, «Теплая речка» трактирын шеф-поварже Иван Антропов Кужэҥер район Йывансолаште илыше Евгений ден Вера Каменщиковмытын ешыштышт лийыныт, пырля икмыняр марий калык кочкышым ямдыленыт: мелнам, салмамуным, туарам.
Тидын деч вара кочкыш мастар-влак Козьмодемьянскыш корным кученыт. Тушто ик ешыште Курыкмарий кочкышым – подкогыль ден кравецым – ямдыленыт. Кумшо кечын нуно Параҥьга велысе Алашайка ялыште уна лийыныт. Верысе тӱвыра пӧртын да республикысе Татар тӱвыра пӧртын еҥже-влак дене пырля «Тышлы тэйкмэк» татар калык кочкышым ыштеныт.
Каласен кодыман, книгалан материалым чумырен шуктымеке, МарНИИЯЛИ-н шанчызыже да диаспор-влакын еҥышт тергат. Тидыже савыктышыште нимогай йоҥылыш ынже кай манын ышталтеш.
Снимкыште: ресторатор-влак – Каменщиковмытын ешыште.
Фотом «Заря» райгазетын воткыл лаштыкше гыч налме.
Молан мый марий Элым йӧратем?
Москва гыч ресторатор Олег Назаров:
– Йошкар Ола пазарыш чеснокым налаш пуренам. Тудо Марий Элыште пеш чапле, эшежым килограммже 350 теҥгем веле шога. Налмем 200 теҥгеш шуын. Но мый оксагалтам мӧҥгыштӧ монден коденам улмаш. Пеленем картычкат лийын огыл. Эшежым сатучылан оксам телефон гыч колтен шым керт, молан манаш гын интернет пашам ыштен огыл. Ынде чеснок деч посна каем манын шоналтышым. Но Екатерина лӱман ӱдырамаш «ида тургыжлане» мане да чеснокым арымеш налын каяш темлыш. Мый моткоч ӧрым. Екатеринан телефон номержым нальым да тудын деч йодым: «Тыге лиеш мо? А трук мый оксам ом колто?» Садет вашештыш: «Еҥ-шамычлан ӱшанаш кӱлеш!» Ынде умыледа, шонем: молан мый Йошкар-Олам да тушто илыше калыкым тыге чот йӧратем. Марий Эл нерген книгамат уло кумылын возаш тӱҥалам. Тиде –кочкыш рецепт-влакым чумырымо книга веле огыл, а марий калыкын тӱвыра ден йӱлашкыже путешествий, тудын унам ончен моштымо койышыжо да ойыртемалтше чесше нерген палдарымаш лиеш.
