Марий кечышот:
27 сентябрь – Свизын, Маска пайрем.
29 сентябрь – тичмаш тылзе.
Марий кумалтышын чинче тушыжо:
Салтакыште улшо-влакым арален кондыштараш йодын кумалме мут гыч:
«Салтаклан кугу погынымашыште шемер калыклан йӧршаш ыҥгайлыкым пу, тӱрлӧ коштан гычын сакле. Кӱшыл тӱтырам ӱлыкӧ волтен, ӱлыл тӱтырам кӱшкӧ кӱзыктен, кок тӱтырам ваш конден, нылле ик пачаш чаршатым почылтарен, кӱрылтдымӧ резыкетым пуэн, пытыдыме рыскалым пуэн, кум тӱрлӧ еш гычын, кум тӱрлӧ вольык гычын, кум тӱрлӧ шурно шот гычын, кум тӱрлӧ шурно, пакча кӧргӧ мӱкш шот гычын, кум тӱрлӧ ший казна дене илаш, Кугу Юмо, ыҥгайлыкым пу! Ме шикш йымал калык улына, ала ойлен моштенна ала уке, Юмо языкеш ит пыште. Ош Кугу Юмо, кумалтышнам кавыл ыште!»
«Марий калык йӱла» брошюр гыч налме.2020 ий.
Черке йӱла почеш:
27 сентябрь – Господьын Эн Пагалыме Ылыжтарыше Ыресшым нӧлталме пайрем.
29 сентябрь – Юмын Аван «Ӱҥышеммым аклен ончал» («Призри на смирение») юмоҥажын кечыже.
30 сентябрь – Святой орланыше Вера, Надежда, Любовь ден нунын София аваштым пагален шарныме кече.
Святой угодниклан (кӧн лӱмжым нумалына) молитва:
«Юмылан йӧршӧ святой (лӱмжӧ), Тый мыланем вашке полшышо, чонем верчынат кумалше улат. Сандене мый тыйым уло чонем дене йодам: мыйын верчем Юмым сӧрвале».
«Марла молитва-влак» книга гыч налме, 2005 ий.
Калык пале:
Сентябрьыште кӱдырчӧ кӱдырта гын, шыже леве, а теле луман лиеш.
Сентябрь мыняр кукшырак да левырак лиеш, тугеже теле вараш кодын толеш.
Куван кеҥеж годым эҥыремышвод шуко – шыже чатка, а теле йӱштӧ лиеш.
Лышташ вараш кодын йога – теле йӱштӧ лиеш.
Сентябрьыште тумлеге пушеҥгыште шуко гын, Рошто вашеш лум шуко возеш.
Турня-влак кӱшнӧ да эркын чоҥештат гын, шыже мотор да сай игече дене куандараш тӱҥалеш.
Турня-влак чоҥештен каеныт – кум арня гыч йӱштӧ толеш.
Шарнаш кодшо ой:
Мыняр кӱшкӧ кӱзет, камвозаш тунар лӱдыкшӧ.
Наҥгаен – акшым кодаш монден.
Коштат гын, кышатым пытарет.
Ӱжара дене кынелат – шӧртньым муат.
Кырат – курж, пукшат – коч.
Сорта тулым шуяш лиеш, мемнан ӱмырым шуяш ок лий.
Кодшо пашаш лум лумеш.
Мален нойышо иктат уке.
Кертам маншылан молат полшат.
А.Е.Китковын «Калыкмут» книгаж гыч налме.
С.Носова ямдылен
Авторын фотожо
