Марий Элын Паша да калыклан пашам ситарыме департаментшын данныйже почеш, регионыштына 1 июньлан налмаште 7071 гражданин пашадымылан шотлалтеш.
Ик тылзе ончыч тиде радамыште 4637 еҥ гына лийын. А идалык тӱҥалтыш гыч пашам ситарыме службылашке 12 тӱжем наре еҥ пашам кычалын толын.
Регионыштына пашадымылыкым регистрироватлыме кӱкшыт кызыт 2,12 процентыш шуын. Тыгодымак пашам пуышо-шамыч 4117 вакансийым темлат.
Тидымат ушештарен кодыде огеш лий: Паша да калыклан пашам ситарыме департамент пашадымылыкын кӱкшытшӧ шотышто данныйым июнь тӱҥалтышлан налмаште ик арнялан вараш кодын пуэн. Очыни, тургыжланен палемдыман: тиде документыште пашадыме-влакын шукеммышт коеш – 3 июньысо данный почеш, пашадымын статусшым уже 7161 еҥлан пуымо, да тиде чот улыжат кок кечыште 90 гражданлан ешаралтын.
Ӱмаште тыгаяк жаплан республикыштына официально пеҥгыдемдыме 3269 пашадыме еҥ лийын.
М.ИВАНОВА
