Кодшо рушарнян эрдене Йошкар-Олаш кок пачашан поезд икымше гана толын. А кастене тудо угыч Москош каен. Тыге ынде кажне кечын лиеш. Мо куандара, билет ак ятырлан шулдештын.
Историй гыч шарнеда, очыни, 1927 ий 7 ноябрьыште Йошкар-Олаш икымше поезд толын. Тунам тиде кугу событий лийын. Рушарнясе событийжат изижак огыл, кок пачашан поезд ӧрыктарен куандарен, поснак икшыве-шамычым. Сандене тудым лӱмын вашлияш толшо-шамычат лийыныт. Йыван Кырлалан пӧлеклалтше памятник воктене пайрем шӱлышан программе эртен. А ты поездыш икымше билетым налше пассажиркылан «РЖД бонус» лояльность программын участникшын шӧртньӧ картыжым кучыктеныт.
Ик пачашан поездым кок пачашанлан вашталтыме билетын акшым чынжымак волтеныт. Тымарте плацкартыш билет 2467 тенге, а купеш 4210 теҥге лийын гын, кызыт купеш билет 2043 теҥге гыч тӱҥалеш. А плацкарт вагон тушто йӧршеш уке. Вагон ресторанат куандара. Горьковский кӱртныгорнын Озаҥысе территориальный управленийжым вуйлатыше Евгений Ананьинын ойлымыж почеш, поездым у технологий дене пойдарыме, тиде сай связь, лӱдыкшыдымылык, пассажир-влакын шичмыштым тергыме, микроклиматым эскерыше системе-влак. Поездыште туалет веле огыл, эсогыл душевой улыт. Шӱкшакым погымо контейнер ситышын, сортироватленат пышташ лиеш. Ик вагоным инвалид-шамычлан полшаш манын, лӱмын йӧнештарыме: коляскым нӧлталаш устройство, йӧнан туалет.
Поезд дене иканаште 800 наре еҥ корныш тарванен кертеш. Тудо тошто расписаний почешак кошташ тӱҥалеш: Йошкар-Ола гыч кастене 19 шагатат 26 минутлан тарвана гын, Москва гыч – 16 шагатат 20 минутлан. Билетым «РЖД» ОАО-н сайтыштыже, мобильный приложений гочат налаш лиеш.
А эше кӱртныгорнын пашаеҥже-влакын ойлымышт почеш, тыгаяк кок пачашан поездым Санкт-Петербург, Краснодарский край велкат колташ шонымашышт уло. Тидыже куандарыде огеш керт: марий рӱдола Российысе моло олаште илыше калыкланат почылтшо, шкаланнат корныш лекташ йӧн лиеш. Теве 30 апрельыште да 7 майыште марий рӱдолашкына «Скалы Поволжья» турист поезд толшаш. Такшым ты поезд Москва – Йошкар-Ола – Свияжск – Москва маршрут дене эрта да кок рейсым ышта. Казанский вокзал гыч 16 шагатат 20 минутлан тарвана. «РЖД» ОАО-н сайтыштыже ончылгоч увертарыме почеш, ты поездыш билетым налше-влак Юл кундемысе пӱртӱсым ужын, тӱвыра да исторический объект-влак дене палыме лийыт. Йошкар-Олаште гын, уло мом ончалаш. Тыгаяк турист поездше икымше гана 2021 ий декабрьыште корныш лектын улмаш. Тушко билетым налше-влаклан маршрут моткоч келшен, сандене РЖД тудым угыч корныш луктын.
С.Носова
