Тыге маналтеш уста художник Иван Ямбердэн сӱретше. Рушлаже автор тудым «Черемисская рапсодия» манын лӱмден. Картиныште шым еҥым ужаш лиеш. Нуно чыланат пешак палыме еҥ улыт. Шолаште марий вате тамак трубкам шупшеш, мужедче кува гай чоян онча. Тиде М.Шкетан лӱмеш драма театрын ик эн лӱмлӧ актрисыже Анастасия Страусова. Картиныште тудо М.Шкетанын «Ачийжат-авийжат» спектакльыштыже Мичу куван рольжым модеш. Воктенже, скрипка дене шоктышо ӱдыр шеҥгелне, кумдан палыме режиссер, мурызо Василий Пектеев. Скрипка дене шоктышыжо – сӱретче Иван Ямбердэн ӱдыржӧ, композитор Татьяна Ямбердова. Шеҥгелне келгын шонен шинчыше марий – тӱнямбал мучко чапланыше композитор Андрей Яковлевич Эшпай. Ончыл планыште лӱмлӧ семмастар, флейтист Виталий Шапкин. Воктенже апшат мастар, Олор ялын полмезыже Николай Тимофеев. Шеҥгелныже сӱретын авторжо, Иван Ямбердэ, ала-кушко мӱндыркӧ ончен шога.
«Марий Эл» газет редакций лудшо-влаклан черетан конкурсым увертара. Иван Ямбердэн «Шочмо мланде ӱжын ужата» («Черемисская рапсодия») картиныж почеш шочшо шонымашдам возен колташ йодына. Эн сайын возышылан Иван Ямбердэ деч пӧлек лиеш – художникын сӱретше. Возымыдам серыш дене редакцийыш колтен кертыда. Тыгак интернет йӧн дене колташ лиеш: abdulov@inbox.ru.
Мут толмашеш, каласен кодена: тиде произведений келге философий шӱлышан, тушто шуко символ, чия-влакат вучыдымо шонымашым таратат. Мутлан, йол йымалсе кӱварымак налаш – тудо ала йӱла, ала…Але теве Анастасия Струсован шола кидыштыже тоян вуйжо кишке вуй гай коеш. Молан?…
Вучен кодына серышдам, пагалыме лудшына-влак!
«Марий Эл» газетын тӱҥ редакторжо А.Абдулов
