КУЧЕМЫШТЕ

Туныктымым чараш амал уке

Марий Элыште у коронавирус инфекцийын шарлымыжлан кöра утларак ямде улмо режимым 4 апрель марте шуйымо.

Тидын нерген регионым вуйлатыше Александр Евстифеев Республикыштына у коронавирус инфекцийым кондымым да шаркалымым шижтарыме шотышто оперативный штабын 4 февральыште эртыше заседанийыштыже увертарен.

«Указын у редакцийже дене келшышын, пашам пуышо-шамычлан пÿсö респираторный чер да пÿсö респираторный вирусан инфекций дене черланыше пашаеҥыштлан кум каныш кечым пуаш да тыгодым пашадарыштым арален кодаш темлыме. Ковид дене черланен кертмым тергыме тестын отрицательный результатше ончычсо семын 72 шагат огыл, а 48 шагат гына вийыште лиеш. QR але медицине организацийыште у коронавирус инфекцийым чытен лекме нерген налме справке айдемын пареммыж деч вара 12 тылзе кучылталтыт», – палемден А.Евстифеев.

Документ почеш 7 февраль гыч 4 апрель марте шинчымашым пуымо чыла организацийыште чаралтеш:

— 18 ияш марте ийготан граждан-влакым ешартыш шинчымашым пуымо программе дене туныкташ;

— 18 ияш марте ийготан ÿдыр-рвезе-шамычлан кружокым, секцийым але кандарыме моло мероприятийым эртараш;

— 18 ияш марте ийготан граждан-влаклан кандарыме, куандарыме, сотемдарыме, тÿвыра, физкультур, спорт, ончер шотан да урок деч варасе моло мероприятийым очно организоватлаш але эртараш.

Роспотребнадзорын Марий Элысе виктемжым вуйлатыше Светлана Булатован мутшо почеш, таче школлаште ковид ваштареш чыла мере шукталтеш: ÿдыр-рвезе-шамыч классла еда посна тунемыт, санитайзер, шкем аралыме средствыла дене пайдаланат, помещений-шамычым южтарат да дезинфицироватлат. Вузлаште тунемше да пашам ыштыше-влак кокла гыч 70 процент ужашыже вакцинироватлалтыныт. Сандене кызыт дистанционно туныктымо йöн эпидемий ваштареш виктаралтше пайдале мероприятийлан огеш шотлалт. Туныктымо пашам классысе але группысо 20 процент еҥын черланымекыже веле чарен шогалтат. Тидыже ковид деч ончычсо жапыштат лийын.

Кызыт МарГУ ден Волгатехын студентше-влак медик-шамычлан аклен мошташ лийдыме кугу полышым пуат: пациент-шамычым врачын приёмышкыжо возат, докторым черлын мöҥгышкыжö ÿжыктымым регистрироватлат, калыкым тестирований, вакцинаций, эмым ситарыме йодышла дене консультироватлат. Тений январьыште «122» службыш 6852 обращений лийын. Линийыште иканаште 28 оператор пашам ышта. Резервым ямдылыме шот дене Йошкар-Оласе медицине колледжыште да Юл кундем кугыжаныш технический университетыште шинчымашым погышо 82 студентым мут модуль дене пашам ышташ туныктымо.

«Пытартыш жапыште стационарлашке эмлалташ пыштыме пациент-влакын чотышт кугемын толеш. Таче койко фондын 24 процент ужашыже гына яра шинча. Неле пациент шукыжак огыл – чумыр чот гыч 10 процент ужаш. Кислород да шодым искусственно вентилироватлыме йöн дене шÿлышö пациент-влакын чотышт 35 да 20 процентлан иземын», – стационарласе сӱрет дене палдарен М.Панькова.

Медицине организацийлаште онкологий, шÿм-вÿргорно чер дене орланыше, тыгак мÿшкыран ÿдырамаш-влак деч моло пациентлан кызытеш плановый полышым пуымым чарныме.

Республикыштына 110 стационар да 119 куснылшо пункт у коронавирус инфекций деч прививкым умбакыже ышта.  Таче кечылан регионыштына илыше калыкын чумыр чотшо гыч 72,5 процент еҥ вакцинацийын тичмаш курсшым эртен.

Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен

Опубликовать в Одноклассники

Добавить комментарий