Лидия ИКСАНОВА: шочмо-кушмо верже дене – Морко вел Кумужъял (Пектывайсола) ӱдыр, профессий дене – туныктышо, чолгалык дене –Марий Мер Каҥашын вуйвержын ончылъеҥже, чон йодмо кумыл дене – сылнымутчо, Россий писатель ушемын еҥже. Куд сборникын авторжо. Тудын почеламутшо-влакым татар, эстон, венгр, англичан йылмылашке кусарыме.
21 декабрьыште Л.Иксановалан 55 ий темын, лӱмгече вашеш ямдылыме интервьюм лудаш темлена.
– Кызыт тыйын чоныштет мо: ӧпке, куан, вургыжмаш, чаманымаш, ласкалык?…
– Кызыт мылам моткоч сай. Ом ондале. Мый вет философ улам, ушемат – аналитический. Эре шонем, вискалем, шымлем – мылам тиде моткоч келша. Тулан имне ийыште шочынам да, садланак, очыни, ӱмыр мучко пеш писе ритм дене иленам. Таче канен ыштем манынжак ом керт. Но эркынрак илем. Тыгай ой уло: «Надо достойно встречать старость». Мутат уке, моло шижмаш-кумылат улыт, но нунын нерген очеркыште возыман, а такшым романланат ситышын. Кызыт жап тыгай, а тудлан акым изиш варарак гына пуаш лиеш.
– Сылнымут пашат кузерак кая? Школышто шуко жап ыштымет иктаж произведенийыште верым муын, очыни?
– Шукертак, учитель пашам ышташ тӱҥалмем годымак, «Туныктышо» поэмылан пижынам, тудым эре возенак шогем. Тиде поэмын ойыртемже: илыме почеш возалтмыже. Шкешотан жапым – эпохым – серен кодымо сылнымут произведений лиеш. Такшым чыла поэт-писатель тыге воза. «Литература отображает жизнь», – манеш ыле критик.
Тымарте мый прозым возен омыл, но паша гыч кайымем ойлымаш ден романым возаш таратыш. Шым ий жапыште интернатын историйжым шымленам, диссертациемат тудын денак кылдалтын, садлан паша вуймутшо «Интернат» маналтеш. Валера Абукаев, Вася Семенов, Миша Кудряшов (пырля университетыште тунемын улына) йодыт ыле: «Лида, ойлымашыштына шкендым палышыч?» Мыят таче образлам палымем-влак гыч «нӧштылам» (воштылеш – авт.).Романым рушла тӱҥалынам. Таче сылнымут произведений-влак интернетыш куснат, тушто – рушла лудшо.
Тичмаш интервьюм 2021 ий 21 декабрьыште лекше «Марий Эл» газетыште лудса.
