2 – 6 июньышто Москваште «Йошкар площадь – 2023» книга фестиваль эрта.
Марий Эл гыч тушко «Марий книга издательстве» савыктыш пӧртын вуйлатышыжын пашажым жаплан шуктышо, поэт Игорь Попов ден Марий Эл писатель ушем вуйлатыше, «Кече/Солнышко» йоча журналын тӱҥ редакторжо, поэт Светлана Архипова каеныт. Организатор-влак 700 утла мероприятийым ямдыленыт. Тӱрлӧ площадке-влак пашам ышташ тӱҥалыт: «Сылнымут литератур», «Йоча да тунемме литератур», «Нон-фикш», «Российсе регион-влак», «Электрон книга» да молат.
– Фестивальыш Российысе регионла гыч 400 издательстве шкенжын лукмо кнага сатужым конден. Нуно 16-шо, 17-ше да 18-ше номеран павильонлаште верланеныт. Йошкар площадьыште эртаралтше книга фестивальыш Марий Элын делегацийже 2015 ий гычак ушна, тунам ты мероприятий Сылнымут идалыкын кышкарыштыже икымше гана эртаралтын, сандене сомыл палыдыме манаш ок лий. Ме уна да книгам налаш толшо-влаклан Марий книга савыктышын продукцийжым темлена. Ты гана шукерте огыл савыкталт лекше «Белая лебёдушка»йомак, Кристина Архипован йоча-влаклан возымо «Бардаклюш-влак Йӱштӧ Кугызам кычалыт» да Анатолий Ишалинын «Марийцы – из далёкого прошлого» книга-влакын презентацийыштым эртарена. Тыгак Москваште печатлалтше «Калык ойпого» антологийын презентацийыштыже участвоватлена. Тиде книгам ямдылымаште Марий Эл Республикын сылнымут редколлегийже пашам ыштен, кугу надырым В.М.Васильев лӱмеш МарНИИЯЛИ-н пашаеҥже-влак пыштеныт, – палдара Светлана Архипова.
Москваште марла книгам налаш кумылан-влакым 16-шо номеран павильонышто вучат.
Л.СЕМЕНОВА
