Йошкар-Оласе «Фестивальный» микрорайонышто 180 веран у йочасад чоҥалтеш.
Микрорайоным 2012 ийыште чоҥаш тӱҥалме, тудо шинча ончылнак пеш писын кушкеш. Кызыт тыште шуко пачашан 30 пӧртым нӧлтен шогалтыме, кумдыкшо – 191 тӱжем квадрат метр. Но йочасад ден школ-влак огыт сите, тиде чот шижалтеш. Сандене тыште илыше-влаклан шке икшывыштым кажне кечын тӱрлӧ вере вес тунемме учрежденийлашке шупшыкташышт перна.
Йочасад социально кӱлешан объектлан шотлалтеш. Марий Эл вуйлатыше Юрий Зайцев тиде йодышлан вашештымыж годым палемден: кумдыкым комплексно вияҥдыме ойпидыш дене келшышын, инвестор йочасадым 2022 ийыштак чоҥен шуктышаш ыле.
– Генеральный застройщик дене вашлийын мутланенам, стройкыш миен терген онченам, чыла ӱчашымашан йодышым рашемдаш мэрийлан кӱштымашым ыштыме. Паша кызыт тарванен, – каласен тудо.
Шуко пачеран пӧрт-влакым сдатлыме дене пырля инфраструктурат иктӧр вияҥшаш. Пример шотеш Юрий Зайцев Йошкар-Олан эҥерӱмбал кумдыкыштыжо чоҥалтше у микрорайонышто тений сентябрьыште почылтшо школым ончыктен.
«Олан Фестивальный ужашыштыже йочасадым чоҥымо йодышым Марий Эл вуйлатыше Юрий Зайцев ик гана веле огыл тарватен. Застройщик-влак дене кужу жап каҥашен мутланыме деч вара чоҥаш тӱҥалме жап шумлык кутырен келшыме», – палемден мэрын пашажым жаплан шуктышо Антон Трудинов.
Микрорайонын генеральный планже дене келшышын, 180 веран кум пачашан йочасадым ыштыме нерген уверым 2021 ийыштак вераҥдыме, чоҥалтшаш вержымат авырен налме. Объект 41-ше позиций семын палемдалтын. Но срок вашталтын, тачысе кечылан теве мо раш: «ПМК-3» заказчик-застройщик, «КонтинентСтрой» генподрядчик улыт, жап шотышто гын, чоҥымо пашам 2024 ий нылымше кварталыште тӱҥалаш да 2026 ий тыгак нылымше кварталыште пытараш.
Пашазе-влак Фестивальный уремын 58а да Западный уремын 15а пӧрт-влак коклаште свайым кыреныт. Кызыт «Континент», «ПМК-3», «Медведевская ПМК» да «Салют» чоҥышо организаций-влак тыршат. «Идалык мучашлан нулевой циклыш лекташ (фундаментым опташ) палемдыме, умбакыже чоҥымо паша график почеш каяш тӱҥалеш», – каласен Антон Трудинов стройкышто лиймыж годым. Тудо план почеш ты микрорайонышто 180 веран кок йочасад лийшашлык нерген да Йошкар-Ола администраций, застройщик-влак дене ик ойыш шуын, чоҥымо паша жапыштыже шукталтеш манын ӱшандарен ойлен.
Лидия СЕМЕНОВА
Михаил СКОБЕЛЕВЫН фотожо
