Российысе туроператор-влакын ассоциацийыштын директоржо Мая Ломидзен шукерте огыл увертарымыж почеш, Ӱярня пайрем пагытлан Российысе турист-влак кокла гыч шукынжо лачшымак Марий Элыш толын каяш кумылан лийыныт. Тыгайже икымше гана палдырне.
Амал деч посна огыл, вет поснак марий Ӱярня шкешотан йӱлаже-влак дене ойыртемалтеш. Тудо Шорыкйол деч вара шым арня гыч палемдалтеш. Лач тудын дене калыкна телым ужата да шошым вашлиеш. Сандене чыла йӱлажат пӱртӱслан ылыжаш, сай сад-пакча лектышым ончен кушташ, еш пиаллан, поянлыклан ешаралташ полшаш манын эртаралтеш. Ончыкылык сай илышлан нимогай чаракым ынже ыште манын, телымат шот дене ужатыман. Ӱярня дене кылдлтше калык пале-влакымат шотыш налман.
Интернетлан кӧра весымат палена, мемнан элын тӱрлӧ лукыштыжо тӱшкан илыше марий-шамыч ты пайремым кумдан эртарат. Эпидемийлан кӧра тений Йошкар-Олаште Ӱярням Марий тӱвыра рӱдер Ленин лӱмеш тӱвыра полатыште театрализоватлыме концерт семын эртарен. Но пайрем йӱла-влакым туштат шуктымым ужаш лийын. Эшежым тенийсе идалык вет Российысе калык-влакын тӱвыра поянлыкыштлан пӧлеклалтын.
Пайрем фойеш пурымаштак тӱҥалын. Гармонь мур семеш Ӱярнян тӱҥ кочкышыжо – команмелна – дене сийленыт. Туштак уста кидмастар-влак Оршанке вел гыч Виталий Кудрявцев ден Советский вел гыч Галина Волкова шке ыштыш-кучыштым налаш темленыт.
Пайремыште Ӱярнян тӱҥ персонажше ден атрибутик-влакымат сценыште ужын кертынна – Кечым, Ӱячам, Мелнам, Ӱярня кувам… Концертым вӱдышӧ-влак – Россий Федерацийын сулло артисткыже Маргарита Медикова да мыскараче Сергей Карпов – ден пырля нунат пайремым сӧрастараш толшо творческий коллектив да мурызо-влак дене палдареныт. Фольклор ансамбль-влак тӱрлӧ район гыч толыныт, сандене кажныжын номерже ойыртематше лийын. Шернур поселко гыч «Пӧлек», Параньга район Ондропсола ял гыч «Поро кас», Советский район Кельмаксола ял гыч «Мари гармонь» семӱзгар, Морко район Марий Кужер ял гыч «Муро аршаш», Медведево район гыч «Мураршаш» ден «Эр ӱжара» коллектив-влак куандареныт. Марий тӱвыра рӱдер пеленысе «Чон оҥгыр ден «Падыраш» ансамбль-влакын, «У муро» вокальный студийын артистше-шамычланат таум ыштыман. Марий кугыжаныш университет пелен чумырымо «Мурсем» ансамбльын студентше-шамычат пырля кушташ лекташ кумылым ылыжтеныт. «Пӧлек» ансамбльже поснак келшыш, Ӱярня нерген тугай репым рашкалтарышт!
Пайремым марий эстраде мурызо-шамычат сӧрастареныт: Александр Егошин, Анатолий Зарецких, Снежана Орлова, Саша Иванов, Олег Славин, Вадим Краснов, Алексей Юнусов да молат. Концертыш налме билет почеш лотерей денат модыктышт, икмынярыштлан пӧлекым кучыктышт. Марий тӱвыра рӱдер вуйлатыше Наталья Пушкина чылаштым Ӱярня пайрем мучашлалтме дене саламлыш, поро тыланымашым ойлыш да команмелнам тамлен ончаш темлыш. Ӱярня кувам йӱлалтен огытыл гынат, йӱла почеш осал деч эрнаш манын, чылан импровизироватлыме капка гоч эртеныт.
Светлана Носова
Р. Николаеван фотожо.
