Кодшо идалык мучаште Маристат республикысе кугыжаныш кучемын икмыняр министерствыж ден ведомство пашаеҥже-влаклан видеоконференций йӧн дене 2020 ийыште эртарыме всерорссийский переписьын иктешлымашыж дене палдарен.
Тӱҥ шотышто Марий Элыште илыше калык нерген увер йоҥгалтын. Маристат специалист-влакын палемдымышт почеш, переписьын иктешлымашыже 11 томыш погынен. Тудым Ростатын https://rosstat.gov.ru/ сайтыштыже муаш лиеш.
Тачысе кечылан Российыште 147 182 123 еҥ ила, марийже – 423803. 2010 ийысе перепись дене таҥастарымаште, марий-влакын чотышт 124 тӱжем еҥлан шагалемын. Тидын годым марий йылме дене мутланышат палынак шагалемын. 2010 ийыште 451033 еҥ лийын гын, 2020 ийлан 258722 еҥ кодын.
Пытартыш перепись почеш Марий Элыште чылаже 677 тӱжем еҥ ила. Тышеч 463 тӱжемже – олаште, 214 тӱжемже – ялыште. Руш-шамыч 323 тӱжем еҥ улыт, марий – 247 тӱжем, татар – 29 тӱжем.
С.Носова
