Роспотребнадзорын Марий Элысе виктемже регионысо калыкым Самара областьысе «АНДИ» ООО-н ямдылен лукмо «Мистер Сидр» сыра шотан напиткыжым йӱмӧ деч шекланаш ӱжеш.
РБК россий мультимедийный холдингын таче 11 шагатат 43 минутлан увертарымыж почеш, палемдыме напиткым йӱмылан кӧра Удмурт республикыште, Самара, Ульяновск да Нижегородский областьлаште 28 еҥ ӱмыр лугыч лийын. Экспертизе суррогат напиткыште метанол ден этилбутиратын нормо деч палынак шуко улмыштым, потребительын тазалыкшыланат, илышыжланат лӱдыкшым ыштен кертмыштым рашемден.
Роспотребнадзорын Марий Элысе виктемжын эскерымыж почеш, 5 июньлан налмаште Марий Элыште тиде продукций дене аяргыме случайым регистрироватлыме огыл.
Кызыт виктемын еҥже-влак палемдыме напиткым оборот гыч лукмо шотышто тӱрлӧ мерым ыштат. Тыгак кочкыш продуктым ужалыше организаций-шамычлан лӱдыкшӧ продукцийым рашемдыме нерген увертареныт. Озанлыкым кучышо субъект-влаклан «АНДИ» ООО-н ямдылен лукмо «Мистер Сидр» сыра шотан продукцийжым ужалымым чарыме нерген предписанийым пуэныт. Верлашке лӱдыкшӧ алкогольым ужалыме фактым рашемдаш лектыныт.
Тыгак медицине организаций-влак дене алкоголь дене аяргыше пациентым кондымо нерген увертарыме шотышто оперативный кылым ыштыме. Лабораторный базе продукцийым шымлаш ямде.
Роспотребнадзорын регионысо виктемже Марий Элыште илыше калыкым Самара областьысе «АНДИ» ООО-н «Мистер Сидр» сыра шотан продукцийжым йӱмӧ деч шекланаш ӱжеш. Тыгай сатум ужмеке, виктемын «шокшо линийышкыже» 8-800-707-61-77, 8 (8362) 68-19-44 номеран телефон дене йыҥгырташ але электрон почтышкыжо sanepid@12.rospotrebnadzor.ru адрес дене возен колташ йодеш. Вашкылым «ВКонтакте» социальный сетьысе https://vk.com/rpn_rme официальный аккаунтыштат ышташ лиеш.
Граждан-влакын обращенийыштым тыгак 424007, Йошкар-Ола, Машиностроитель-влак урем, 121-ше пӧрт, 1-ше корп. адрес дене налыт. Йодмашым виктемын 12.rospotrebnadzor.ru сайтыштыже тӱҥ лаштыкыште вераҥдыме электрон формо але МФЦ-н отделенийже гочат колташ лиеш.
Палемдыме продукций дене аярген кертме ситуацийым Роспотребнадзорын Марий Элысе виктемже шке контрольышкыжо налын.
М.ИВАНОВА
Фотом интернет гыч налме
