ТАЗАЛЫК

Каньылын шижаш, кужун илаш…

Марий Элыште илалше еҥ ден инвалид-влакым кужу жап ончымо системым ыштыме шотышто пилотный проект умбакыже вияҥеш.

Тудо илышыш социальный обслуживанийын кок формыж дене пурталтеш: стационарыште да Звенигово, Юрино, Оршанке районлаште, Волжскышто да Йошкар-Олаште мöҥгыштö.

2022 ийыште тиде пашалан федеральный бюджет гыч 55 миллион утла теҥгем ойырымо.

Яра услуго дене тыгай полышлан мöҥгыштö тÿнен илыше 200 наре еҥым да стационарыште 100 утла гражданым авалташ палемдыме.

Калыклан социально полшымо комплексный рÿдерлаште реабилитацийлан кÿлешан технический средствам прокатыш пуымо пашам вияҥдат. Прокат пунктлашке да нелын черланыше-влакым ончаш туныктымо школыш 1039,9 тÿжем теҥгелан 38 коляскым, 100,236 тÿжем теҥгелан ступенькоходым, 288,841 теҥгелан ходунок ден роляторым налме. Тыгак кужу жап эре ик семын кийымылан кöра коваштын локтылалтмыж деч аралыше матрасым, велотренажерым, электрический кроватьым, насадкым да моло йöнештарымашым налаш палемдыме.

Илалше еҥ ден инвалид-шамычым эшеат сайын ончаш манын, рÿдерын штатышкыже эше 105 пашаеҥым налаш палемдыме. Профессиональный стандарт дене келшышын, нуным Йошкар-Оласе медицине колледжыште «Ончымо шотышто полышкалыше (сиделке)» программе почеш туныктат. Пашадарымат 25 тÿжем теҥге наре тÿлат.

Илалше еҥ ден инвалид-влакым кужу жап ончымо системын эше ик кÿлешан направленийже уло: «Ончаш туныктымо школ» родо-тукымлан специальный занятий-влакым эртара.

Тиде системе илалше еҥ ден инвалид-влаклан шкем йырвел кумдыкышто каньылынрак шижаш да кужун илаш сай йöным ыштышаш.  

М.ИВАНОВА

 

Опубликовать в Одноклассники

Добавить комментарий