Марий Элыште грипп ваштареш прививкым ынде нылымше арня ыштат, да палемдыман: тудо кечын вийым налеш.
21 сентябрьыште республикышкына «Совигрипп», «Ультрикс Квадри» да «Флю-М» вакцине-влакым кондымо. Федеральный бюджетын средстваж кӱшеш налме чыла 155 тӱжем дозым республикысе медицине организацийлашке шеледен колтымо, да 23 сентябрьыште регионыштына грипп ваштареш прививкым ышташ тӱҥалме.
– Тазалыкым аралыме тӱнямбал организацийын темлымыж почеш тиде эпидсезонышто грипп ваштареш палемдалтше кум валентан вакцинын чыла кум штаммжым вашталтыме. Тӱҥ амал вирусын мутироватлалтмыж дене кылдалтын. Калыкын гриппын у штаммжылан иммунитетше эше уке, сандене вакцинацийым эрташ пайдале веле огыл, эсогыл кӱлеш. Прививкым ыштыме эн сай пагыт – сентябрь мучаш, октябрь, ноябрь: тиде жапыште эпидемий уке, а вирус деч аралыше иммунитет 2-3 арня гыч лиеш, – палемда Марий Элын тазалык аралтыш министржын алмаштышыже Татьяна Бастракова.
Грипп ден ОРВИ 2027 ий январь-февральыште озаланаш тӱҥалын кертыт, тыгодым поснак «сӧсна грипп» манме штамм чот шарлен сеҥа, шижтарат Роспотребнадзорын пашаеҥже-влак.
Грипп ваштареш вакцинацийым Прививкым ыштыме национальный календарьыш пуртымо. Тудын дене келшышын, эн ончычак йоча (куд тылзаш гыч тӱҥалын 11-ше классыште тунемше марте), студент, тазалык аралтыш, образований, транспорт, социальный аралтыш системын пашаеҥже, муниципал кугыжаныш служащий, призывник, мӱшкыран ӱдырамаш, 60 ий деч кугурак ийготан еҥ, инфекциян огыл хронический черан пациент-шамычым илыме верысе поликлиникылаште, образовательный организацийлаште, предприятийлаште да моло вере тӱлыде вакцинироватлат.
Препаратым медик пациентын тазалыкшым тергыме деч вара палемда. ОРВИ дене черланыме, инфекциян огыл хронический чер пӱсемме, чыве муношылан аллергий палдырныме годым прививкым ышташ чаралтеш.
Роспотребнадзорын Марий Элысе виктемжын палдарымыж почеш, республикыштына грипп ваштареш прививкым ыштыме кампаний кечын вийым налеш: икымше арнянак 60 тӱжем наре еҥ, ты шотыштак, 27073 йоча, вакцинацийым эртен.
– Грипп ваштареш вакциным 25 сентябрьыште нална да прививкым тиде кече гычак ышташ тӱҥална, – арня ончыч Волжск оласе рӱдӧ больницын Сотнур участковый больницыштыже лиймем годым палдарыш эмлымверын вуйлатышыже Сергей Антонов. – Поликлиникыштына кугыеҥ-влакым участковый терапевт да мый, тӱшка практике врач, приниматлена. Мемнан участкына изирак, да 800 дозым пуэныт. Тудым, калыкын чотшым шотыш налын, медпункт еда шеледышна, шканнат мыняр кӱлеш кодышна. Коеш, калык вакциным вучен: 10 кечыште 300 наре еҥ прививкым ыштыктен.
Эмлымверыште тыгак грипп ваштареш прививкым ыштыше бригадым чумыреныт. Тудо вакцинацийым йочасадлашке, школлашке, предприятийлашке да моло вере лектын эртара.
– Кугыеҥ-шамыч шукынжо шкеак приёмыш толыт да прививкым ышташ йодыт. Тидым теве мо дене умылтарат: эпидсезонышто грипп да ОРВИ дене огыт черлане, инфицироватлалтыт гынат, кок-кум кече гыч тӧрланат. Кундемыштына вакцинын пайдалыкше нерген ситышын палат, сандене прививкым ыштыме показательнат 80 процентыш шуэш, – рашемдыш Сергей Николаевич.
– Ме прописке почеш 2700 наре еҥым обслуживатлена. Грипп ваштареш вакцинын 1300 дозыжым налынна, да тымарте пелыжым уже кучылтынна, – кокымшо кабинетыште палдарыш участковый врач-терапевт Галина Михайлова.
– Прививкым поснак илалше еҥ ден хронический черан пациент-шамыч кумылын ыштыктат. Калык коклаште коштшо-шамычат чылан гаяк вакцинироватлалтыт. Теве Людмила Юрьевнат кажне ийын аралалтеш, – ешарыш участковый медсестра Валентина Павлова да Сотнур территориальный пӧлкам вуйлатышын пулышышкыжо «Ультрикс Квадри» препаратым колтыш.
– Мый теве мом умыленам: грипп ваштареш прививкым кажне ийын ышташ гын, чынжымак, от черлане, – мане Людмила Яковлева.
Врач-педиатрын кабинетше 470 икшывым обслуживатла.
– Мыланна грипп ваштареш вакцинын 300 дозыжым пуэныт. Кызытеш Сотнур школышто да йочасадыште 90 икшывылан прививкым ыштенна. Тыгак 10 студент эмлымверыш лӱмынак вакцинироватлалташ толын, – грипп ваштареш прививке кампанийын шырымже дене палдарыш йоча кабинетын участковый медсестраже Светлана Яндакова. – Вакцине сай, участкыштына прививкым ыштыме деч вара ик йочаланат йӧсӧ лийын огыл. Ача-ава-шамычат шочшыштым кумылын вакцинироватлат. Прививке дене кажне ийын 99,7 – 99,8 процент йочам авалтена.
Сотнур больницыште ик шагат наре лийым да медик ден пациент-влак кокласе кылым шке шинчам дене ужым: икте-весым колыт, умылат, тазалыкым арален кодаш да пеҥгыдемдаш тыршат. Да тидлан тыште чыла йӧн уло.
Маргарита ИВАНОВА.
Авторын фотожо.
