Александр Майоров Российын педагогшо-шамычлан икойлыкым, сеҥымашым да у йолташ-влакым тыланен.
«Таир» рӱдерыште Россий педагог-влакын XXХIII турист слётышт почылтын. Россий калык-влакын икоян улмо идалыклан пӧлеклалтше мероприятийыш элнан 28 регионжо гыч 400 утла туныктышо толын. Слётын тӱҥ шонымашыже – педагог-шамыч коклаште келшымаш да профессионал кылым пеҥгыдемдаш, практике мастарлыкым шуараш, у тунемме ий тӱҥалме деч ончыч куатым да сай кумылым пӧлеклаш.
Мероприятийым торжественно почмо церемонийыште саламлыме мутым Кугыжаныш Погын председательын алмаштышыже, «Марий Эл Республикысе профсоюз организаций-влакын объединенийышт» ушемын председательже Александр Майоров ден парламентын бюджет да экономический политике шотышто комитетшын председательже, МарГУ-н ректоржо Михаил Швецов ойленыт.
Россий калык-влакын икоян улмо идалыкыште педагогический сообществе-шамычын ик тичмаш улмышт шергакан. Тӱрлӧ регион гыч туныктышо-шамыч шке примерышт дене вашла пагалымашын да кушкын толшо тукымым воспитатлымаште тӱҥ пашан нимучашдыме улмыштым пеҥгыдемдат. А туризм ден краеведений йоча-шамычым шочмо элым йӧратыме шӱлышеш кушташ полшат, палемден Александр Майоров да Марий кундемын унаже-влаклан сай кумылым, сеҥымашым, у йолташ-шамычым тыланен.
23 август марте эртыше слётышто участник-шамычлан шкем поснат, команде денат тӱрлӧ направленийыште ончаш йӧн лиеш, вет мероприятийын программыже моткоч поян.
Маргарита ИВАНОВА.
Марий Эл Кугыжаныш Погынын пресс-службыжын фотожо.
