9 Майыште Марий Элын рӱдолаштыже Кугу Ачамланде сарыште Сеҥымашлан 80 ий теммылан пӧлеклалтше Сеҥымаш парад лийын.
Йошкар-Ола гарнизонын войскаже, специальный военный операцийын участникше, республикысе чыла силовой ведомствын еҥже, кадет да юнармеец-влак рӱдӧ уремла мучко торжественный марш дене эртеныт.
Сеҥымаш парадын ик эн оҥай татше семын военный техникын механизироватлыме колонныжын кудал эртымыжым палемдыман. 15 технике коклаште оласе паркын постаментыштыже шогышо Т-55 танк лийын. Машинам парадлан ончылгоч ямдыленыт, да тудо шествийым технический велым палынак сӧрастарен.
Марий Элым вуйлатыше Юрий Зайцев парадын участникше-влакым: ветеран, военнослужащий да регионышто илыше-шамычым – пайрем дене шокшын саламлен.
«9 Май – шуко нациян элыштына илыше-влакын ик эн кугу пайремышт. Тиде кече миллион дене еҥын шӱм-чоныштыжо калыкын патырлыкшым, икоян улмыжым да сеҥаш лийдыме куатшым ончыктышо курымашлык символ лийын. Россий Федерацийын президентше Владимир Владимирович Путин сеҥыше-влакын тукымыштым чапландарыме, нунын героизмыштым шарныме да таче тиде пашам шуйышо сарзе-влак лӱмеш 2025 ийым Шочмо элым аралышын идалыкше семын увертарен», – манын тудо.
Калыкна ынде 80 ий элнан эрыкше верч илаш-колаш шогышо-шамычын патырлыкыштым кугешнен шарна.
Кугу Ачамланде сарын фронтышкыжо 140 тӱжем утла землякна каен. Нунын кокла гыч 53 сарзе «Совет Ушемын Геройжо» чап лӱм дене палемдалтын, 14 еҥ Слава орденын тичмаш кавалерже лийын. Кажне кокымшо фронтовик мӧҥгӧ пӧртылын огыл.
Сӧй пасушто вуйым пыштыше-влакым шарнаш да историйын чынже дене кушкын толшо тукымым палдараш – мемнан порысна.
Регионым вуйлатыше ветеран ден тылыште тыршыше-влаклан шкем чаманыде кредалмыштлан, пашам ыштымыштлан, тыныс кава да эрык верч пеҥгыдын шогымыштлан вуйым савен тауштен.
«Лачшымак те, чыла нелым чытен, фашист машинан рӱдыжым шалатенда. Да лачшымак те, сар гыч пӧртылын, элнам ломыж гыч нӧлтенда. Те, сеҥыше тукым, мыланна Шочмо эллан ӱшанле улмо образец улыда», – палемден Марий Элым вуйлатыше.
Юрий Зайцев трибуно гыч тачысе кечын геройжо-влак – передовойышто адакат фашизм ваштареш кредалше сарзе-шамыч – нергенат кугешнен ойлен.
«Россий Армийын военнослужащийже-влак специальный военный операцийыште, кугыжанышнам лӱдыкшӧ деч арален, шке порысыштым кӱлын шуктат. Элнан интересшым аралыше-шамычлан уло шӱм-чонем дене тауштем», – каласен Юрий Зайцев.
Сеҥымаш парад – совет калыкын подвигше курым гыч курымыш илаш тӱҥалмым пеҥгыдемдыше волгыдо событий. Марий Элыште илыше калык тунамсе жапым эре шарнаш да шке геройжо-шамыч дене кугешнаш тӱҥалеш.
Марий Элым вуйлатышын пресс-службыжын уверже негызеш Маргарита ИВАНОВА ямдылен.
