Сеҥымашын кечын 77-ше лӱмгечыжым ме уремлаште ветеран-влак деч посна вашлийынна. Но тидын годымак мемнан коклаштак кызыт Украинысе спецоперацийыште участвоватлыше салтак-влакын ача-авашт улыт. Моткоч кочо тидым ужаш, нунылан кугу чаманымашым гына ойлаш кодеш, но «Курымашлык полк» акций годым ты спецоперацийыште колышо-влакынат портретыштым наҥгайыше-влак лийыныт. Шке шочшын колмыж нерген уверым налаш кеч-могай ешланат – кугу ойго. Лач тыгай тулык вате, ача-ава-влакым ты гана Марий Эл Правительстве Сеҥымаш кечым палемдыме мероприятийлаш ӱжын ыле. Ик тыгай еш Кужэҥер районысо Шорсола ял гыч – Сергей ден Людмила Петуховмыт (снимкыште) – толын. Пырля Ева ӱдырышт лийын. Антон эргышт шукерте огыл Украиныште вуйым пыштен. Моткоч сай рвезе, ушан-шотан, чолга лийын, спортын тӱрлӧ видше дене кылым кучен. Тудым тояшат шуко калык погынен. «Юлтехыште» тунемын. Вара, «академкым» налын, шке кумылын армийыш служитлаш каен. Пел ий эртымеке, контракт почеш спецоперацийыш логалын. Кужэҥер район гыч тачысе кечылан кум рвезе тушто вуйым пыштен. Ачажын ойлымыж почеш, эргыжым «Мужество орден» дене палемдышаш улыт.
6 майыште Кужэҥер тӱҥ школышто тыште тунемше да Украинысе спецоперацийыште вуйым пыштыше Александр Волковлан мемориал оҥам сакеныт.
Воинский долгым шуктышыла тудын ӱмыржӧ кӱрылтын. Тале спортсмен верысе аграрно-строительный техникумым тунем лектын. 2020 ийыште армийыш каен, контракт службым ойырен налын. Тунемше-влак школ кумдыкышто Александр лӱмеш кедр пушеҥгымат шынденыт. Тудо элнам аралыше салтак нерген ушештараш тӱҥалеш.
Марий Турек районысо Карлыган школыштат спецоперацийыште вуйым пыштыше тудын выпускникше Ильшат Галлямовлан, Шернур районысо Зашижимье селаште Руслан Терентьевлан, Медведево районысо Руэм школышто Иван Тороповлан, Азаново селаште Николай Уманцевлан тыгак шарнымаш оҥа-влакым пижыктеныт. Моткоч чаманена, тыгай самырык рвезе-влакын илышышт кӱрылтмылан. Шочмо элна верч вуйыштым пыштымыштым калыкна эре шарнаш тӱҥалеш.
С.Носова
