У ий салам: Волжский район
У пиал дене, у шонымаш дене!
Игече келшен толдымым ончыде, ме, фермер-влак, эллан кӱлшӧ продуктым ситарышашлан тений чапле саскам ончен куштенна. Да, мутат уке, куштылгын огыл. Кажне гражданинлан шке отрасльыштыже могай-гынат тергымашым эрташ логалын да кажныже могай-гынат лектышыш шуын.
Шушаш ийыштат палемдымым шуктымылан ӱшаным огына йомдаре. Производствым кугемден толмаш да паша верым ешарымаш предприятийнан тӱҥ шонымашыже лийын кодеш. Вет паша верым ешарен гына ялыште илыше-влакым шукемден кертына. Самырык алмаштышым куштымо нергенат огына мондо. Ончыкылык пашаеҥ-влакым школ ден вузлаште туныктымылан умбакыжат полшаш тӱҥалына. Ме умылена: агрокласс – яллан пашаеҥым профессионально туныкташ тӱҥалмаште кӱлешан негыз.
У ий дене эн ончычак шке ешемым, ача-ава ден лишыл еҥ-влакым саламлем. Эреак пеленем лиймыштлан да полшымыштлан тауштем.
Саламлем тыгак «Овощная лагуна» кооперативын пашаче ешыжым да Волжский районышто илыше чыла еҥым. Тазалыкым, куатым, паша кумылым, йӧратымашым да ваш умылымашым тыланем. Да, мутат уке, – калыкын улан илышыже да элысе тыныслык верч пашам ышташ. Пырляште да тӱшкан гына мемнан да элнан ончылно шындыме задачым да шонымашым шукташ лиеш.
Андрей ПУШКИН,
ИП, «Овощная лагуна» кооператив вуйлатыше
Учимсола
Юрий ИСАКОВ ямдылен
Альбом гыч налме фото
