Марий Эл Кугыжаныш Погынын президиумжын еҥже-влак республикын прокуроржо Илдус Нафиков дене икымше гана вашлийыныт.
Мутланымаш аракам йӱмаш да алкоголизм ваштареш профилактикым эртарымашке виктаралтше законодательствым шуктымо шотышто прокурор надзорын пашаж нерген каен.
Прокурор Илдус Нафиков ден Марий Эл Кугыжаныш Погын председатель Михал Васютин мемнан регионлан ты йодышын пӱсылыкшым палемденыт, амалже – аракам йумылан кӧра еҥ-влак шукын колат, санденак ты зиян ваштареш кучедалаш у йӧн-влакым кычалманак.
Ты шотышто прокуратурын пашаж дене федерал законодательствым шуктымым эскерыше пӧлка вуйлатыше Ильдус Алимов палдарен. 1 ноябрьлан республикыште арака сатум рознице дене ужалаш лицензий 130 организацийын уло. Тений гына спиртан йӱыш дене 153 еҥ аярген, 96 еҥ илыш дене чеверласен. Йӱшывуяк ты пагытыште 596 преступленийым ыштеныт, ты амалланак кӧра 36 процентлан корно транспорт происшествий чот кушкын…
Прокуратур пашаеҥ-влакын палемдымышт почеш, ойгандарыше статистикылан уполномоченный орган-влак велым контроль иземме да начар профилактик паша «полшат».
Кызыт теве сырам, сидр ден моло тыгаяк йӱышым ужалыме правилым пеҥгыдемдыше законын у проектше ышталтын. У нормо сатум ужалыме 53 объектым авалтышаш. Нунылан паша режимыштым вашталташ логалеш. Тыште ончыктен кодыман: федерал законодательстве дене келшышын, 1 апрель гыч шуко пачашан пӧртлаште верланыше аракам ужалыше общественный питаний объект-влакын паша режимыштым регион шке гыч палемден кертеш.
Вашлиймаште тыгак депутат-влак шке округлаштышт закондымын почмо верлаште спиртан йӱышым ужалымаш ваштареш кучедалме мера-влак дене палдареныт да икмыняр тыгай вержын законлын пашам ыштымыштым тергаш темленыт. Депутат-влак сай качестван огыл алкоголь сатум ужалыме заведений- влакын мыняр улмыштым, кажне колымаш дене кылдалтше случайым рашемден толашак кӱлмӧ нерген ойленыт. Илдус Нафиковат темлымаш-влак дене келшен.
Параламент вуйлатыше Михаил Васютин аракам йӱмӧ шотышто калыкыште профилактике пашам саемден толаш темлен.
Светлана Носова ямдылен
Фотом Марий Эл Кугыжаныш Погынын пресс-службыж гыч налме
