Марий Эл вуйлатышын пашажым жаплан шуктышо Юрий Зайцев кыдалаш профессиональный образованийым пуышо системыште IT-направленийым кумданрак шыҥдараш задачым шынден.
Республикын образований да науко министрже Лариса Ревуцкая «Образований» нацпроектын «Самырык профессионал-влак» федеральный проектше илышыш шыҥдаралтмыж нерген ойлымыж годым палемден: Марий Элыште пашазе да специалист-влакым 25 профобразований организаций ямдыла. «Ончылгоч шотлен лукмо почеш экономикыште кӱлеш наре пашазе специальность дене тунемаш налме контроль цифрым кажне ийын терген шогена», – каласен министр.
Тунемше-влак кокла гыч тыгай профессийым да специальностьым налыт: промышленность – 16%, чоҥымо паша – 16,5%, транспорт да логистике – 13%, кочкышым ямдылыме – 9%, ялозанлык – 7%, IT-технологий – 6%. 2022 — 2023 тунемме ийлан 4784 еҥым тунемаш налаш палемдыме, тидыже кодшо ий дене таҥастарымаште 90 верлан шукырак.
Министр порфессиональный шинчымашым производство да паша ресурс дене ушаш кӱлмӧ нерген посна ойырен каласен. 2022 — 2024 ийлаште федеральный казна гыч 30 мастерскойым почаш окса ойыралтеш, 11-же идалык мучаш марте пашам ышташ тӱҥалшаш. Тылеч посна «Самырык профессионал-влак» проект дене келшышын, тений республикыштына Профессийлан жапым ончылтен туныктымо рӱдер ышталтеш. Тушто граждан-влак йодмашан да кӱлешан специальностьым налын кертыт, тидыже республикыште кадр ситыдымашым мыняр-гынат кораҥдаш полша.
Юрий Зайцев IT-направлений дене программе почеш кыдалаш профобразований организацийлашке тунемаш толшо-влак шагалемшаш огытыл манын палемден.
Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен
Д.РЕЧКИНЫН фотожо
