10 июльышто Марий Эл гыч спецоперацийым эртарыме ккундемыш гуманитар полышын черетан партийжым колтымо.
Ты гана мобилизоватлалтше, шке кумылын але контракт почеш Луганск, Донецк калык республиклаште, Херсон да Запорожье областьлаште кредалше сарзе землякна-влаклан кок фуро дене колтышаш 20 тонн гуманитар полышым погымо. Тушто ныл автомобиль, а тиде бронироватлыме УАЗ, «Нива», «буханке»-УАЗ кок машина, мотоцикл, бензопила, тепловизор, квадрокоптер улыт.
«Нива» автомобильым «Заводская» ЖЭУК коллективын чумырымо шийвундыж дене налме, а мотоциклым Йошкар-Олаште илыше еҥ (лӱмжым палемдаш кӱштен огыл – авт.) пуэн.
– Тыгак эше тӱрлӧ технике ден автотранстпортлан шапаш ужашым, газ оборудованийым, быт арверым, вургемым, гигиенылан кӱлшӧ средстве гай озанлык сатум, военнослужащий землякна-влакын йолташышт, родо-тукымыштын чумырымо посылкыштым колтена, – палемден Промышленность, экономике вияҥмаш да торговльо министерствын пӧлка вуйлатышыже Максим Карташов. – Чыла коробкам маркироватленна. Тушко боецна-шамычын телефон номерыштым возымо, садлан палемдыме еҥын кидышкыже миенак шуэш.
Марий Эл правительстве председательын алмаштышыже Степан Воронцовын палемдымыж почеш, гуманитар полышым колтымым Марий Эл вуйлатыше эскеренак шога, тудо отпускыш толшо военнослужащий-влак дене вашлиймашымат эртара, нунын командирышт денат кылым куча да сарзе-влаклан кредалмаште да илышыште лачшымак мо кӱлмым рашемда.
– Гуманитар полышан конвой Марий Эл вуйлатыше Юрий Зайцевын кӱштымыж почеш чумыралтеш. Тудым погаш Марий Эл правительстве 12 миллион теҥгем, мер организаций-влакат шийвундым ойыреныт, тыгак эше 17 муниципальный образований гыч именной манме пӧлек уло. Тиде гана колтымо полышнат спецоперацийыште улшо землякна-влакын кумылыштым нӧлта да сеҥымашым лишемдаш полша, – палемден Степан Воронцов.
СВО-н участникше-влаклан полышым районлаште илыше-влакат шке кумылын чумырат. Теве, мутлан, Медведево район Шнаран гыч Тамара Катькова эргыжлан да тудын полкысо салтак-влаклан шере кочкышым, вургемым, гигиене предметым да молымат поген.
– Андрей эргым илышыжым военный паша дене кылден, латкандаш ий контракт почеш служитла. СВО тӱҥалмеке, мутат уке, тушко колтеныт. Вес эргымжат шке кумлын спецоперацийыш кайынеже, – чонжым почо поро кумылан, кӧргӧ вий-куатан ӱдырамаш – Гуманитар полышым чумыраш Андрейын йолташыже-влак, тыгак пырля тунемше Альбина Степанова полшеныт. Чылаштлан пеш кугу тау.
А.Байкова.
Авторын фотожо.
