Кодшо кечылаште У Торъял районышто кыдалаш группо тӱшкашке пурышо рвезе-влак коклаште мини-футбол дене кудывече модмаш эртен.
Таҥасышке 5 команде ушнен – тиде райрӱдӧ гыч «Спартак», «Тигры», «Львы» да Овалже ден Тошто Торъял гыч рвезе-влак.
Районысо администрацийын физкультур да спорт отдел вуйлатышыжын палдарымыж почеш, «Спартак» командын участникше-влак ялтак кугыеҥ семынак модыныт да моткочак ойыртемалтше икмыняр сӧрал голым пуртеныт.
Эн ончычак нуно Тошто Торъял гыч футболист-шамычым 5:2, вара Овалже гыч командым 3:0, «лев-шамычым» 5:0, «тигр-влакым» 6:1 счет дене сеҥеныт да икымше верыш лектыныт. Кокымшо вер дене Тошто Торъял гыч команде, кумшо вер дене «Тигры» палемдалтыныт.
Турнирыште «Эн сай модшо» лӱмым Г.Васильев, «Эн сай вратарь» лӱмым А.Котэ сеҥен налыныт.
Ойыртемалтше-влакым медаль да шарнымашан футбол статуэтке дене палемденыт, тыгак кажне участниклан напитке да мороженыйым кучыктеныт.
Л.Камалетдинова
Фотом интернетысе соцкыл гыч налме
