14 мартыште самырык-влак полат гыч Донецк ден Луганск республик-влаклан гуманитар полышым колтеныт.
– Сату-влак Марий Элысе предприятий, мер организаций, марий епархий, волонтёр, самырык еҥ, школышто тунемше-влак дене пырля погалтыныт. Таче ме, кок машина дене, 13 тонн нелытан продовольствий грузым колтенна. А тидыже шыл ден кол консерве, тӱрлӧ шӱраш, рожки, сакыр, ӱй, чай… Погаш кажне район гыч полшеныт, – палемден Марий Эл правительстве председательын алмаштышыже Степан Воронцов. Акций умбакыжат шуйна. Кочкыш сату деч посна, чоҥымо материал-влак кӱлыт. А тунемме идалык вашеш школлан келшыше сатум ямдылыман.
Ушештарена, республикыштына ты акций 24 февральыште тӱҥалын. Неле ситуацийыш логалше-влаклан кузе полшымаш нерген увер дене умбакыжат ВКонтакте, Телеграмм да Viber мессенджерласе «Помощь беженцам в Марий Эл» чат-бот гоч палдараш тӱҥалыт.
О.МОШКИНА
Авторын фотожо
