Республик вуйлатыше Юрий Зайцев Росгвардийын Марий Элысе управленийжын пашаеҥже-влакым ведомствым ыштымылан 10 ий темме дене саламлен.
– Тендан профессионализмда да пашам кӱлеш семын шуктымыда дене республикыште ласка мер-политике обстановко аралалтеш, Марий Элыште илыше-влак лӱдыкшыдымылыкым шижыт. Посна тауштымашым специальный военный операций жапыште задачым шуктымо годым лӱддымылыкым ончыктымылан каласынем. Тудын тӱҥалме икымше кечыж гычак Росгвардийын Марий Элысе управленийжын пашаеҥже-влак моло подразделений-влак дене пырля, чын героизм примерым ончыктен, шочмо элын интересшым аралымашке шогалыныт, – палемден Юрий Зайцев.
Республик вуйлатыше Росгвардийын специальный да военный технике выставкым, тыгак специальный военный операций жапыште тушман деч поген налме вооружений образец-влакым, бронеаралтышым да моло трофейым ончен савырнен.
Регион вуйлатыше ведомствын ойыртемалтше, служебный порысыштым шуктымо годым лӱддымылыкым ончыктышо пашаеҥже-влаклан кугыжаныш да республиканский награде-влакым кучыктен.
Росгвардийын Марий Элысе управленийже РФ Национальный гвардийын войскаже-влакын федеральный службыжын приказше дене 2026 ий 30 сентябрьыште ышталтын.
Управленийын составышкыже СОБР (специальный отряд быстрого реагирования), ОМОН (отряд мобильный особого назначения), Лицензионно-разрешительный паша рӱдер, тыгак Вневедомственный охране отдел пурат.
Марий Эл вуйлатышын пресс-службыжын уверже негызеш Любовь Камалетдинова ямдылен.
