Аэропорт
Идалык мучаш марте ямде лиеш
Регионым виктарыме рӱдерын вияш эфирыштыже республикнан транспорт да корно озанлык министрже Александр Герасименко Йошкар-Ола аэропортышто чоҥымо паша кузе кайыме нерген каласкален.
Александр Анатольевич рашемден: аэропортышто у терминалым чоҥымылан Марий Эл правительстве ден республикын Транспорт да корно озанлык министерствыже мутым кучат.
Аэропортын у зданийжым эше январьыштак чоҥен пытарыме, ынде оборудованийым кондымо йодышымат решатлен шуктымо. Вес арняште документ-влак пакет Росавиацийыш колталтеш, да ямде объектым пашаш колташ разрешенийым вучаш гына кодеш.
А самолёт нӧлталтме-шичме полосам ыштымылан федерал структур-влак вуйын шогат. Тусо пашам мучашлыме жап – 2027 ий – «Ространсмодернизациий» ФКУ ден «МСУ-1» АО коклаште кутырен келшыме негызеш палемдалтын. Тиде объектым вашкерак сдатлыме шотышто йодыш решатлалтеш.
У полоса 2,4 километр кужытан лиеш, тушечын 1,2 километрыштыже кӱшыл бетон лончым ыштыме. Чоҥымо паша умбакыже шуйна, палемден Александр Герасименко. Проектым технический решений почеш тӧрлымаш тыгай неле объектлан келшен толеш. Таче подряд организацийын пашаже экспертизым эрта, сандене тудым мыняр ыштен шуктымо идалык мучаште рашемеш. Минтранс ден подрядчик деч пурышо данный почеш, идалык мучаш марте полоса тӱрыс ямде лиеш.
Объект тыглай огыл – проект почеш, самолёт нӧлталтме-шичме полоса дене пырля тушко лекме-пурымо корно да чоҥештымашым виктарыме диспетчер пункт лийшаш улыт.
«Мыйын шонымаште, вучаш шукак кодын огыл, паша чарныде ышталтеш. Сандене ӱшан дене каласен кертам: республикнан у аэропортшо кеч-могай самолётым вашлияш йӧршӧ лиеш», – каласен Александр Герасименко.
Юрий ИСАКОВ.
Снимкыште: у аэропорт зданий.
Марий Эл вуйлатышын пресс-службыж деч налме фото.
