«Учаевым лудмаш: марий йылмым туныктымо негыз»
Марий образований институтышто «Учаевым лудмаш: марий йылмым туныктымо негыз» республик кӱкшытан VIII шанче-практике конференций лийын.
Ончычсо семынак тудын тӱҥ шонымашыже – образований системыште этнокультур предметла дене шинчымашым пуышо туныктышо-влакын профессионал, шанче-шымлыме моштымашыштым вияҥдаш.
Конференцийыш погынышо-влаклан сай паша лектышым эн ончычак Марий образований институтын ректоржо Лариса Овчинникова тыланен. Тудо палемден: пайдале туныктымо опытым шымлыме да тудым палдарымын кӱлешлыкше кугу, сандене ты сомылым умбакыже шуйыман.
Профессор, Марий Эл калык образованийын сулло да Россий Федерацийысе кӱшыл профессионал образованийын почётан пашаеҥже Зиновий Васильевич Учаев могай педагог да наставник лийын – пленарный заседанийыште Марий образований институтын марий филологий да культурологий кафедржым вуйлатыше, филологий науко кандидат Елизавета Игнатьева почын пуэн. Марий Эл правительстве пеленысе Йылмым, литературым да историйым научнын шымлыше В.М.Васильев лӱмеш марий институтын «Лингвистике» направленийже дене кугурак шанче пашаеҥ, доцент, филологий науко кандидат Серафима Сибатрова Зиновий Учаевын шанче сеҥымашыжым кызытсе йылмызе-влакын кучылтмышт дене палдарен.
Конференцийын «5-ше да 6-шо класслаште марий йылме дене у учебный пособий дене пайдаланыме шотышто методический темлымаш-влак» площадкыштыже Марий Эл Образований да науко министерствын марий йылме дене учебник-шамычым федерал переченьыш пуртымыж нерген ойленыт. Тыгак тыште уэмдыме стандартлам илышыш пуртымо условийыште 5-ше, 6-шо класс-влаклан марий йылме дене учебник-шамыч дене пашам ыштыме ойыртем шотышто мутым тарватеныт.
«Этнокультур содержаниян инноваций проектлам виктарымаш: йодмаш гыч проект сату марте» стратегический сессийыште образовательный организацийыште кызытсе жаплан келшыше йӧн дене проект пашам виктарыме механизм шотышто каҥашеныт, ты направлений дене педагог-наставник-влак паша опытышт дене палдареныт.
Тыгак конференцийыште шочмо йылмым, литературым да ИКН-ым туныктышо-влак ик эн пайдале туныктымо йӧнышт дене мастер-классым ончыктеныт.
Г.Кожевникова
Фотом Марий образований институтын сайтше гыч налме
