«ШИЙ ПАМАШ» ФОНД САМЫРЫК АВТОР-ВЛАКЛАН МАРИЙ ЭЛЫН КАЛЫК ПИСАТЕЛЬЖЕ ВЯЧЕСЛАВ АБУКАЕВ-ЭМГАК ЛӰМЕШ СЫЛНЫМУТ КОНКУРСЫМ 2025–2026 ИЙЛАН УМБАКЫЖЕ ШУЯ
Конкурсын тӱҥ шонымашыже:
• шочмо йылме, сылнымут полшымо дене самырык авторын (кыдалаш да кӱшыл школышто тунемшын, тыгак кумда илыш корныш икымше ошкылым ыштышын) чон арулыкшым аралаш;
• кӧргӧ чон куатшым пеҥгыдемдаш;
• шинчымашыжым кумдаҥдаш;
• йылме усталыкшым вияҥдаш.
Конкурс В. Абукаев-Эмгакын тыгай ӱжмутшо дене эрта: «Таче возымет теҥгечысе деч сайрак лийшаш!»
Конкурсын ыштышаш пашаже:
• серыме пашалан кумылан ӱдыр-рвезе-влакым чумыраш;
• сылнымут полшымо дене рвезе еҥлан шочмо калыкнан историйжым, йылмыжым, тӱвыражым, философийжым аклаш йӧным ышташ;
• сылнымут гоч рвезе еҥын тӱняумылымашыжым кумдаҥдаш;
• сылнымут дене шӱлышӧ пиалан айдемым ончен кушташ;
• самырык еҥлан усталыкшым вияҥдаш йӧным ышташ;
• ончыкылык сылнымутчо, журналист-влакым ончен кушташ.
Конкурсым эртарыше-влак:
• «Ончыко» сылнымут да мер-политик журнал: 424006, Йошкар-Ола, Панфилов урем, 39. Тел.: 45-34-64;
• «Марий Эл» газет: 424006, Йошкар-Ола, СССР Вооружённый Вийын 70-ше идалыкше урем, 20. Тел.: 49-55-11;
• «Кугарня» самырык-влаклан газет: 424006, Йошкар-Ола, СССР Вооружённый Вийын 70-ше идалыкше урем, 20. Тел.: 23-27-22;
• «Кече / Солнышко» йоча журнал: 424006, Йошкар-Ола, Панфилов урем, 39. Тел.: 20-22-08.
Серымылан акым редколлегий пуа:
1. В.В.Краснов, поро кумылым ончыктышо «Ший памаш» фондым вуйлатыше;
2. Л.А.Абукаева, филологий науко доктор, В.М.Васильев лӱмеш йылмым, сылнымутым да историйым научно шымлыше марий институтын профессоржо;
3. А.С.Абдулов, Марий Эл Республикысе «Марий Эл» информационный агентстве» кугыжаныш автоном тӧнеж директорын икымше алмаштышыже, историй науко кандидат;
4. С.Д.Архипова, «Кече / Солнышко» журналын тӱҥ редакторжо, Россий писатель ушемын Марий Элысе пӧлкажым вуйлатыше, поэт;
5. С.Ф.Пехметова, «Марий Эл» газетын тӱҥ редакторжо, журналист;
6. И.В.Степанова, «Кугарня» газетын тӱҥ редакторжо, журналист;
7. Г. Ф.Гордеев, Марий самырык театрын сылнымут пӧлкажым вуйлатыше, драматург;
8. Э.А.Иманаев, Марий Эл Республикысе «Марий книга издательстве» савыктыш пӧрт ГАУ-н директоржо, журналист;
9. В.А.Кольцов, ВГТРК-н «Марий Эл» ГТРК» филиалжын радиовещаний службыжын журналистше;
10. М.И.Матвеев, Марий Эл Республикысе тӱвыра, печать да калык-влакын пашашт шотышто министрын алмаштышыже;
11. Ю.И.Соловьев, прозаик, драматург;
12. Г.Л.Сабанцев, Марий Элын калык поэтше;
13. И.Г.Попов, «Ончыко» журналын тӱҥ редакторжо, поэт.
Автор-влакын серымышт тыгай йыжыҥ дене аклалтыт:
• эн сай поэзий – «Кинде-шинчал» премий;
• эн сай прозо – «Ошкеча» премий;
• эн сай драматургий – «Кайыккомбо кашта» премий;
• эн сай журналист паша – «Виш чон» премий;
• эн сай теле-радиожурналист паша, блогер – «Канде толкын» премий.
Конкурсын эртыме радамже:
• конкурсыш Россий Федерацийыште илыше, марла серыше кажне самырык еҥ (35 ий марте) ушнен кертеш. Нуно жанрым шотыш налын пашам ыштышаш улыт;
• автор шке возымыжым (компьютереш поген печатлымым; 1 экз.) «Ончыко» журнал але «Марий Эл» да «Кугарня» газет редакцийлашке «В. Абукаев-Эмгак лӱмеш конкурсыш» палемдымаш дене колтышаш;
• редколлегий автор дене пашам ышта, тыгодым кугу тӱткышым мутвундо поянлыкшылан, марла ойым, сылнымут произведенийын кышкаржым чын чоҥен моштымыжлан ойыра;
• 1 ноябрь гыч 1 декабрь марте автор Фондын вуйлатышыж лӱмеш йодмашым сера. Йодмаш дене пырля анкетысе йодышлан вашешта. Газет ден журналлаште савыкталтше сылнымутшым але книгажым редколлегийлан аклаш темла. Документым «Ончыко» журнал редакцийыш (424006, Йошкар-Ола, Панфилов урем, 39-ше пӧрт) кондыман;
• конкурс Йошкар-Олаште Марий Элын калык писательже Вячеслав Абукаев-Эмгакын шочмо кечыжым палемдыме годым (декабрь мучаш) иктешлалтеш;
• конкурслык роскотым Фондын вуйлатышыже В. Краснов палемден. 2025–2026 ийласе фонд – 100 тӱжем теҥге;
• сеҥыше-влаклан диплом ден окса премий (20 тӱжем теҥге дене) кучыкталтеш.
Пашада ушныжо, йолташ-влак!
Снимкыште: 2024 ийыште конкурсышто сеҥыше-влак Дарья Быкова, Виктория Матвеева, Полина Пуртова да «Ончыко» журналын тӱҥ редакторжо Игорь Попов.
Фотом Зоя Дудинан воткыл лаштыкше гыч налме.
