Айдеме капкыл ужашыжым чӱчкыдынжӧ кеҥежым сусырта. Шуко еҥ сусырын шокшо пагытыште начарынрак да кужунрак иланымыжлан, эсогыл шӱяш тӱҥалмыжлан вуйым шиеш. Тыгай шотан ситыдымашым кузе тӧрлаташ?
- Шинчалан вӱд. Тудым 1 ужаш шинчал да 10 ужаш вӱд дене ямдылат. Шӱйшӧ сусырыш примочкым кече мучко 10-15 минутлан пыштат. Тиде йӧн пуалмым шӧра да шӱйшым луктеш.
- Кояшудо (алой). Тудым ожнысек сусырым иландарыше да бактерийым пытарыше кушкыллан шотлат. Кояшудым сусырыш компресс семын пыштат. Тидланже кушкыл лышташым тыгыдемдат да сокшым пунчал налыт.
- Йод (снимкыште). Тудым сусыр йыр йыгат. Тыге ыштыме дене инфекцийлан шарлаш чаракым ыштат, да пуалшат шӧрла. Йодым тыгак компрессым ышташ ямдылыме алой сокыш ешарат.
- Эм шудо. Сусырым соҥгырануж (шалфей), висвис да календуло настой да отвар дене мушкыт.
- Мумие. Тиде пӱртӱс веществам йӱыт. Тидланже 1 стакан вӱдеш 0,2 л мумием шулыктарат.
Сусырын иланыме жапше тӱрлӧ амал дене кылдалтын. Тудым мӧҥгыштӧ эмлен сеҥыдыме гай чучеш гын, врачын приёмышкыжо каяш кӱлеш. Келге сусырым шотыш налаш, кӱлын эмлаш огыл гын, инфекций вӱрыш пурен кертеш, а тидыже айдемын илышыжлан моткоч лӱдыкшӧ.
М.ИВАНОВА ямдылен
М.Иванован фотожо/ «Марий Эл» увер агентстве
