Марий кугыжаныш университетын Медицине институтшын кугурак курслаштыже тунемше студент-влак республикысе медицине организацийлан тӱҥ врачышт дене вашлийыныт да ончыкылык паша вер шотышто радамын мутланеныт.
Больницым ма поликлиникым вуйлатыше кажне тӱҥ врач самырык специалист-влак ончылно выступатлымыжым «Марий Эл Республик тазалык аралтыш системын медицине организацийлаштыже квалифицироватлыме кадрым ситарымаш» регионысо проектым илышыш пуртымо кышкарыште врач-шамычым шке медицине тӧнежышкыже ӱжаш йӧн семын аклен.
Кажне вуйлатыше шке эмлымвержым моктен, тудын сай шӧрынжӧ нерген каласкален. Куанен палемдыман, таче врач-шамычлан сай пашадарым сӧрат: ялысе медицине организацийлаште – 80-90 тӱжем теҥге марте.
Таче самырык врач-шамычым пашадар дене веле огыл, тыгак медицине организацийлашке кызытсе оборудований ден транспортым ойырымо, перегыше производствын принципше-влакым шыҥдарыме денат кумылаҥдаш лиеш. Мутлан, Юрино посёлкышто тений почмо у поликлиникыш пашам ышташ мийыше врач-влаклан чыла шотыштат йӧнан кок пачерым ойырат да «Ялысе доктор» программын участникше лияш – 1,5 миллион теҥге кугыт компенсацийым налаш – йӧным ыштат.
Шернур районысо рӱдӧ больницын тӱҥ врачше Т.Христофорова шке эмлымверже нерген моткоч оҥайын каласкален, а Морко районысо рӱдӧ больницын тӱҥ врачше Н.Антюшина самырык стоматолог К.Половникова дене толын, кокымшыжо студент-влакым шке пашаже, коллективын ойыртемже дене кумылын палдарен.
Психоневрологический да наркологический диспансерлам вуйлатыше-влак пашан сай велже-шамыч кокла гыч кужу отпускым – кок тылзе утла жап – палемденыт, а южо тӱҥ врач оҥай пашаш да икоян коллективыш ӱжмӧ деч посна эше еш илышым чоҥаш полшаш сӧрен.
Марий Эл Тазалык аралтыш министерствын ведомствыштыжо улшо медицине организацийлаште 2024 ий тӱҥалтыште 2080 врач пашам ыштен, эше 330 утла доктор, ты шотыштак дефицитныйлан шотлалтше специалист, моткочак кӱлеш. Кокымшыштлан привилегийымат ыштыме – тений Марий Элым вуйлатыше Юрий Зайцев поснак дефицитный специализациян врач-шамычлан социально полшымо у мере-влакым пуртымо нерген пунчалыш кидпалыжым пыштен. Тудын дене келшышын, медик-влаклан илыме верым саемдаш кум миллион теҥге ойыралтеш.
Кузе шке шонымашке шуаш кӱлмӧ да аҥысыр специализациян врач лийын кертме нерген Тазалык аралтыш министерствын кугыжаныш граждан службо да кадр паша пӧлкажын начальникше Е.Рокина каласкален.
Вашлиймаш деч вара студент-влак пашам пуышо-шамыч дене эше кужу жап мутланеныт, ятыр йодышыштым рашемденыт. Нунын кокла гыч шукышт шочмо республикыште кодаш кумылым ончыктеныт, а тидыже отрасльыште палдырныше кадр дефицит годым моткочак кӱлешан.
М.ИВАНОВА
Марий Эл Тазалык аралтыш министерствын фотожо
