Сӧрымӧ почеш, «Озавате» мужыр лаштыкыште тачат ме У Торъял район Кузнеч ял гыч Александра Григорьевна Ермакованак эше ик кочкыш рецептшым темлена. Молан? Тиде ганат тудо сийым ямдылымаштыже ойыртемалтше секретше дене палдара.
Тачат ме Кугече пайрем годым ямдылаш келшен толшо мелнам кӱэшташ тӱҥалына. Тиде –
Команмелна
«Команмелнам мый пареҥге дене ыштем. Руашыжым пельменьлан гайым ямдылем. Но тыштат изирак секрет дене пайдаланем: тыглай вӱд олмеш газан минеральный вӱдым пыштем. Тудо руашым тамлыракым да сайракым ышташ полша, – палдарыш уста озавате. Да умбакыже рецептшым ойлыш:
– Команмелна руашым ышташ теве мо кӱлеш:
- пел литр минеральный вӱд,
- пел кило ложаш,
- 1 изи совла шинчал,
- 2 кугу совла нӧшмӱй.
Руашым тыге ямдылем:
- минеральный вӱдыш шинчалым, ложашым пыштем да сайын лугем, вара нӧштылам;
- руаш утыждене пеҥгыде ынже лий манын, нӧшмӱйым ешарем да эше ик гана сайын нӧштылам.
А тылеч ончыч мелнавалым ямдылем.
Тидлан теве мо кӱлеш:
- 2 кило пареҥге,
- 2 кугу совла ушкал ӱй,
- 2 кугу совла манный шӱраш,
- 2 муно,
- 1 кугу совла шинчал,
- пел стакан шӧр.
Тудым тыге ямдылем:
- мелнаваллан мый могай сортышто крахмал шуко, тугай шӱштыра пареҥгым налам;
- .тудым эрыктем, шинчалым ешарем да шолтем;
- кӱмекше, вӱдым ястарем, тӱем;
- тушко ушкал ӱйым, манный шӱрашым ешарем да лугем;
- йӱкшымекше, муным пыштем, шӧрым темем да эше ик гана сайын лугем.
Ынде команмелнам ямдылаш тӱҥалына.
Эн ончычак руаш гыч келшен толшо кугытан комым ыштем. Тидлан стакан дене тыртыш-шамычым пӱчкеден луктам. Вара кажныжым салма кугыт марте да вичкыжын, 1-2 миллиметр кӱжгытан веле лиймешкышт, шарем. Умбакыже коҥгаште эн ончычак ик велжым, вара вес велжым кӱктен луктам. Тылеч вара ӱмбакышт пареҥге немырым шарем, уэш коҥгашке шындем да пареҥге чевергымешке кӱктем. Команмелна ямде.
Перкан лийже! – тыланен, ойжым мучашлыш Александра Григорьевна.
Уста озавате такшым эше икмыняр рецептше дене палдарен. Нунат путырак ойыртемалтше улыт. Адакшым нине сийым ямдылыме годымат Александра Григорьевна изирак секретше-влаклан эҥерта. Сандене умбакыжат палдарыме да палдарыме веле шуэш. Но эре ик еҥын гына темлыме сийжым савыкташ пеш сӧралжак огылла чучеш. Тиде амал дене тыланда, пагалыме лудшына-влак, нунын нерген вес гана, изишак жап эртымеке, каласкалена.
Любовь Камалетдинова
