Кодшо кечылаште Удмуртийыште, Шаркан районысо Старые Быги ялыште, Финн-угор кухньо VIII тӱнямбал фестиваль эртен. Тушко «Теплая речка» трактирыште тыршыше-влак миеныт (снимкыште. И.Антропов Юлия пелашыж дене – шолаште).
Тушеч пӧртылмекышт, трактир вуйлатыше, чапланыше ресторатор Иван Антропов дене телефон дене мутланышна. Ойлымыж почеш, фестивальыш нуно икымше гана ушненыт да тидлан моткоч куаненыт. А чылаже тушко 7000 участник ден уна чумырген.
– Ме коптитлыме лудо, пареҥге да торык гыч ыштыме подкогыльым, команмелнам, пызлыгичке ден турнявӧчыж гыч морсым, коншудо гыч кӱэштме киндым, олма ден полан гыч ватрушкым, ирсӧсна гыч шашлыкым, ошвоҥго дене висте (полба) немырым да эше шуко тӱрлӧ моло тамле сийым намиенна, – каласыш Иван.
Фестиваль жапыштак марий калыкын тӱвыражым палыме шотышто шкешотан викторине-йодыштмашым сцене гыч эртареныт да, мутлан, «Йошкар-Ола рушлаже кузе лиеш?», «Ӱмаште Финн-угор тӱнян рӱдывержылан могай илем шотлалтын?», моло йодышым пуэденыт да ойыртемалтше-влаклан Йошкар-Оласе шыл комбинатын кочкышыжо-влакым пӧлек шотеш кучыктеныт.
«Чын вашмутым шуко еҥын палымыже да каласымыже чотак куандарыш. Тыгак уна-шамыч коклаште мемнан трактирыште лийше да сийнам тамлыше-влакат лишемыныт да тидын нерген ойленыт. Тидат кумылым нӧлтен», – куанен каласыш Иван.
«Сарафан радио» манме шке пашажым ыштен да фестивальыште пеш писын мут шарлен: марий-шамычын кочкышышт моткоч тамле. Тылеч вара мемнан деке моткоч шукын лишемыныт да кочкышнам пеш писын налын пытареныт. Поснак подкоголь ден команмелна келшеныт. Мый шкежат моло-влакын ямдылыме кочкышыштым тамлен онченам. Пеш келшен!» – ойлыш ресторатор.
А нунын командыштлан Марий Турек районысо Кугу Карлыган ялысе тӱвыра пӧрт пелен чумырымо «Зардон» удмурт калык фольклор ансамбль полшен да усталык дене кылдалтше ужашым сӧрастарен. Да сӧрастарен веле огыл, а хореографий конкурсышто икымше верыш лектын!
– А ме фестивальыш икымше гана веле миенна да тушто тӱрлӧ конкурс эртаралтме нерген пален огынал. Сандене «У нас вкуснее!» национальный кухньо сий-влак конкурсын участникше семын веле диплом дене палемдалтынна.
Вес ийын тушко уэш каена гын, а мемнам кызытак ӱжыныт да эсогыл ты гана айлыме вернамак шушаш ийланат коденыт, конкурслашке ушнаш шонена. Молан манаш гын, командынат, эн кугу стенднат, сийнат организатор-влаклан моткоч келшен, – палдарыш пытартышлан Иван Антропов.
Любовь Камалетдинова
Фотом соцкыл гыч налме
