Марий Элысе кыдалаш профессионал образованийым пуышо организацийлаште шинчымашым погышо ик эн уста 29 студент республикын чапшым Россий кӱкшытан «Профессионал-влак» чемпионатын отборочный этапыштыже араленыт да сеҥымашышт дене куандареныт.
Профессионал мастарлык таҥасымаш Россий мучко тӱрлӧ регионышто эртен. Мемнан ӱдыр-рвезе-влак чумыр налмаште 29 компетенций дене моштымашым ончыктеныт. Кажныжын пеленже эксперт-наставник лийын, лач тудо самырык еҥым паша опытшо дене эн тӱҥалтыш гычак палдарен, туныктен, кӱлешан ой-каҥашым пуэн да полшен. Нунын тыршымышт арам лийын огыл. Чемпионатыште «Коҥгам оптымаш» компетенций дене Йошкар-Оласе строительный техникумын студентше Иван Конков кокымшо верым сеҥен налын. Тудын наставникше – опытан преподаватель Алексей Афанасьев.
Бронзо медаль дене тиде тунемме верыштак шинчымашым погышо Антон Русинов палемдалтын. «Кермычым оптымаш» компетенций дене тудым наствникше Валерий Токмалаев ямдылен.
– Профессионал мастарлык дене таҥасымаште шкем тергымаш студент-влаклан моштымашым вияҥдаш, конкурент лияш, квалификацийым нӧлташ полша. Конешне, тиде – аклаш лийдыме практике да таҥасыме опыт. Ончыкыжым тудо карьерым ыштымаште кӱлешан лиеш. Марий Элын самырык еҥже-влакын «Кермычым оптымаш» да «Коҥгам оптымаш» компетенцийла дене сеҥымашыштлан моткоч куаненам да нунын дене кугешнем. Сай результатым тыгак мемнан студент-шамыч «Сетевой да системе администрирований», «Промышленный механике да монтаж» компетенцийла дене ончыктеныт. Нунын дене участникна-шамыч Санкт-Петербургышто тений 25-29 ноябрьыште эртыше чемпионатын финалыштыже республикнан чапшым аралаш тӱҥалыт.
Марий Эл правительстве Россий кӱкшытан «Профессионал-влак» чемпионат толкыным вияҥдыме верч тырша. Республиклан самырык да кӱкшӧ квалификациян, писын вашталтше условийыште пашам ыштен кертше, профессионал могырым кушкаш кумылан специалист-влак моткочак кӱлыт, – каласен Марий Эл образований да науко министр Лариса Ревуцкая.
Йошкар-Оласе строительный техникумын директоржо Ирина Зяблицева палемден:
– Тыгай чемпионат толкыныш тунемме верлан ушнаш кӱлеш. Профессионал мастарлык дене таҥасымаш – конкурсант-влаклан веле огыл, тыгак эксперт-шамычлан вияҥашышт йӧн. Студентна-влак дене кугешнена! Вет тиде – мемнан сеҥымашна. Наставник-шамычлан кугу таум ойлена, лач нуно самырык еҥын моштымашыжым чын ужын шуктат да вияҥдаш полшат.
Г.Кожевникова
Фотом Марий Эл Образований да науко министерствын сайтышт гыч налме.
