31 октябрьыште Марий тӱвыра рӱдер Российыште илыше марий-влакын федеральный национально-культурный автономийышт, республикын Образований да науко, Тӱвыра, печать да калык-влакын пашашт шотышто министерствылаже полшымо дене «XXI курым тӱҥалтышысе еш поянлык да тудын тукымвож серлагышыже» регион-влак кокласе краеведений конференций-конкурсым эртарен. Тушко Марий Эл гыч самырык шымлызе ден туныктышо-шамыч гына огыл, тыгак Удмуртий, Татарстан, Свердловск кундемла гычат марий тӱвыра, йӱла нерген шукырак пален налаш шонышо-влак чумыргеныт. Шымлызе-влак еш тукымвожым, мӧҥгыштышт ятыр ий аралалтше арвер-влакын историйыштым шымленыт.
Конференций тӱҥалтыште Марий Элын тӱвыра, печать да калык-влакын пашашт шотышто министрын алмаштышыже Г.Ширяева, Российысе марий-влакын ФНКА-штым вуйлатыше Л.Яковлева саламлыме шомакым каласеныт. Варажым историй науко кандидат Н.Попов тений эртарыме «XXI курым тӱҥалтышысе еш поянлык да тудын тукымвож серлагышыже» этноэкспедицийын лектышыж дене палдарен. А педагогике науко доктор С.Фёдорова «Еш поянлык: традиционный формын эволюцийже» презентацийым ончыктен. Тудо ешын илышын чыла шӧрнышытыжат кугу верым налмыжым палемден. Икте-весе коклаште ваш умылымаш, пагалымаш, аклымаш лийшаш манын каласен. Семёновка селасе 21-ше №-ан школышто кугыжаныш марий йылмым туныктышо О.Васенина марий йылме уроклаште еш темым кучылтмо нерген ойлен.
Пленарный заседаний деч вара чыланат секцийлаште пашам ыштеныт.
Конференцийыште йоҥгалтше кажне паша ойыртемалтше лийын. Тунемше-шамычын презентацийым ямдылымышт годым ятыр шымлымашым эртарымышт шижалтын. Но икте кумылым волтен: докладым шукынжо рушла ыштеныт.
Жюрилан эн сайжым ойыраш куштылгыжак лийын огыл. Чылаже 42 участник лийын. Кажныжлан дипломым да пӧлекым кучыктеныт. Кумшо верым Морко район Арын школын тунемшыже В.Степановлан («Ешемын поянлыкше» паша), Марий радиомеханический техникумын студентше-влак Д.Цветкова ден Д.Ивановлан («Шарнымаш корно дене»), Йошкар-Оласе 14-ше №-ан гимназий гыч Е.Семёновалан («Ешын тукымвожшо поян») пуэныт. Кокымшо вер дене Волжск оласе лицейын тунемшыже А.Панфилова («Ешемын тукымвожшо»), Кужэҥер район Шорсола школ гыч Ю.Иванова («Ешемын святыньыже»), Шернур район Марисола школын тунемшыже Д.Максимов («Дудинмыт ешын тукымвожшо») палемдалтыныт. Икымше верым Морко район Унчо школын тунемшыже-влак В.Евсеева ден К.Макарова («Тукымлам ушышо кӱвар»), Волжский район Шарача школ гыч А.Томцев («Ешемын эн шерге арверже. Йыдал тукымем шарныктара»), Козьмодемьянск оласе «Дарований» школ интернат гыч Д.Егорова, А.Горшков («Ешемын тошто арверже») (7162-снимкыште) налыныт.
Посна призым Марий Турек район Косолап школын тунемшыже Д.анииил ден Никита Бондаревмытлан, У Торъял посёлкысо школын тунемшыже Е.Ерёминлан, Морко посёлкысо 6-шо №-ан школын туныктышыжо Н.Михайловалан, Татарстан Республик Арск район Шорамучаш школын туныктышыжо О.Антиповалан кучыктеныт.
Л.ШАБДАРОВА.
М.Скобелевын фотожо.
