«Шун веле огыл…»
Йошкар-Олаште Калыкле прикладной сымыктыш тоштерыште «Шун веле огыл…» лӱман ончер почылтын. Тушто художник, керамист-влак Фаина Лебедева ден Марина Крылован пашаштым чумырымо.
Фаина Николаевнан пашаже-влак чынжымак ойыртемалтше да профессионал кӱкшытан улыт. Тудо 1964 ий 1августышто Киров область Пижан район Аптыл ялыште шочын-кушкын. 1975-1979 ийлаште 1-ше №-ан школ-интернатыште тунемын, вара Йошкар-Оласе художественный училищыште шинчымашым поген, умбакыже Йошкар-Оласе кермыч заводышто керамике цехыште художник-керамист-влак Алевтина Шайдуллина да Марина Ширманова дене пырля пашам ыштен. Тудо жапыште шун дене кидпашам ышташ пижын.
Фаина Лебедева композицийлашкыже ойыртемалтше сыным пурта. Тушто марий калыкын илышыж гыч тӱрлӧ ужашым ужаш лиеш. Пашалаштыже марий калыкын койыш-шоктышыжым, вургемжым, тыгак ялысе илыш-йӱлам ончыкта.
Фаина Николаевнан пашажым Марина ӱдыржӧ шуя. Ончерыште тудынат пашаже-влак улыт. Марина шамот дене пашам ышташ йӧрата. Тиде пеҥгыде, фактуран материалым лӱмын ойырен налын. У технологийын вияҥмыжлан кӧра Марина Крылова шкаланже у йогыным, «Цифр сымыктышым», почын. Тыге, у технологийлан эҥертен, компьютер программе полшымо дене цифр форман художественный произведенийым шочыкта.
Михаил СКОБЕЛЕВ, Лидия ШАБДАРОВА
М.Скобелевын фотожо
