Кече утларак кужемеш, йӱд кӱчыкемеш. Уремыште леве, окна гыч кечыйолат чӱчкыдынрак да чӱчкыдынрак койылалта, кайык-влакын йӱкланымыштат чоным куандара. Шижыда, йолташ-влак, шошо лишемеш?! Тидлан кӧра кажныже витаминан кочкышым кочкаш тырша.
Мурызо, артист да палыме еҥ-влак шошо велеш утларакше мом кочкаш кумылан улыт?
Евгений Садовин, Марий Элын сулло журналистше:
– Шуктымо ковыштам, шинчалтыме киярым, тыгак морозильникыш кылмаш пыштыме снегым, облепихым…
Качыри Бавай:
– Винегретым.
Татьяна Степанова (Морко Таня), республикысе Калык усталык да культур ден каныме паша шотышто шанче-методике рӱдерын пашаеҥже:
– Нӧрӧп гыч лукмо шуктымо ковыштам, тыгак ужар шоганым, укропым, петрушкым, кинзам шолтымо шӱман пареҥге дене моткоч йӧратем, шинчаланшудат пеш тамле. Садлан лум шулен пытымым, мланде кошкымым чот вучем.
А.БАЙКОВА
Авторын фотожо
