Тыге лӱмден 5 ноябрьыште М.Шкетан лӱмеш Марий национальный драме театрыште эртаралтшаш усталык касшым Марий Элын сулло артистше Алина ЕГОШИНА.
Тунеммаш – эн шерге поянлык
Шернур районысо шуко пӧртан Шӱдымарий ялын шаршудан уремже дене чарайолын куржталше изирак капкылан, кече гай волгыдо чуриян да канде шинчан изи ӱдыр, кушкын шумекыже, артист лиеш да республикнан ик эн кугу марий театрыштыже шке мастарлыкше дене калыкым куандараш тӱҥалеш манын, иктат шонен огыл, очыни. Моло икшыве семын ӱдыр вожылшырак кушкын гынат, парт коклаште шинчыме годымак артист лияш шонен пыштен.
– Йоча пагыт коча-кова суртышто эртен. Нунын мӧҥгыштышт коҥга шеҥгекыла кайымаште кугу гына занавес кечен. Тушто мыланна, уныкашт-шамычлан концертым ончыкташ пеш келшен. Йошкар-Ола, Шернур гыч Галина, Римма акаймыт йочашт-шамыч дене толыт ыле, да ме икшыве-влак кечыгут дене концертым ончыктенна. Нуно почеламутым лудыныт, муреныт, куштеныт, а мый вӱдышӧ лийынам, – йоча пагытшым порын шарналта Алина. – Шарнем, ачай мыланна йомакым эре лудеш ыле, ковам мурым мурен, такмакше-шамычым торашке шергылтарен, а кочам тале да калыкын йӧратыме гармонистше лийын.
Нунымак ончен, ӱдыр усталык шӱлышан кушкын. Парт коклаште шинчыме годымат чыла гаяк концертыште, пайремыште мастарлыкым ончыктен, садлан Марисола кыдалаш школ деч вара М.Щепкин лӱмеш Кӱшыл театр училищыш тунемаш пурен.
– Ойырен налме турыш толмеке палыме лийынна. Шарнем, Алина Шернур вел тувырым чиен ыле. Комиссий ончылно муралтыш, кушталтыш, а вара Владимир Багратович Монаховын пеледышын иланымыжым ончыкташ йодмым чот мастарын шуктыш. Моткоч ӧрынам да але вара артист пашаште тыгайымат ышташ логалеш манын шоналтенам. А мылам чодыраште коштмо годым трукышто кишкым ужмым ончыкташ кӱлын, – студент пагытыш пӧртыльӧ Алинан йолташ ӱдыржӧ Марий Элын сулло артистше Елена Мочалова. – Москошто тунемме годым ик пӧлемыште ваш-ваш полшен, икте-весылан эҥертен, келшен иленна. Ача-ава, родо-тукым, республик деч ӧрдыжтӧ лийме годым марий ӱдыр-рвезе-влак эре пырля лийынна. Алина тыршен тунемын, кажне занятийыш йӧратен коштын. Чолга студент, уста озавате улмыжо тунемак палдырнен. Шарнем, мемнан деке йолташ ӱдыр-влак чӱчкыдынак унала толеденыт. А мемнан чайгоркана шагал лийын, садлан лӱмынак кевытыш чай сервизым налаш каенна.
… Умбакыже «Марий Эл» газетыште лудаш темлена
А.БАЙКОВА
Фотом еш альбом гыч налме
