Выньык деч посна могай монча? Кугурак-влакын тыге ойлымыштым шуко гана колынам. Шокшо мончаште выньык дене капкылым пералтымеке, да эше икмыняр шомакым пелештен колтымеке, могыр каныме, куштылеммыла чучеш. Пушыжат тудын моткоч тамле, свежа! Южышт выньыкым лывыжтарыме вӱдшымат пайдале йӱышлан шотлат.
Йолташ-влак, а те мончаште выньык дене кыралташ йӧратеда? Выньыкашым шке налаш коштыда? Куэ дене пырля эше вес пушеҥге укшлам пыштеда мо?
Саша ИВАНОВ, мурызо, гармоньчо:
– Кажне мончалан выньыкым лывыжтена. Тудын тамле пушыжак кумылым нӧлта. Ончыгече выньыкашлан укшлам тодышт кондышым. Кудывечыште, ӱшыкан верыште, ачам кучен. Ме кажне ийын витле наре мужыр выньыкым ямдылена. Тений кукшо да шокшо игечылан кӧра лышташ тыгыдыракла чучеш.
Йочана годым лӱмынак мыланна тумо гыч изи выньыкым ыштат ыле.
Анатолий ВЕДУШЕВ, «Витекс» ООО-н директоржо:
– Мончаште выньык деч посна нигузеат огеш лий! Тудын свежа пушыжо йӱштӧ телымат сылне кеҥеж пагытыш пӧртылта. Кажне кеҥежым Йошкар-Ола воктенысе чодыраш выньыкашым налаш коштына. Теле мучкылан мыланна иктаж 22 мужыр выньык кӱлеш, а моло годымжо свежам налына. Южгунамже лӱмегож выньыкымат мончаш пуртем, тудыжо пӧрт ончылнак кушкеш.
Евгений САДОВИН, Марий Элын сулло журналистше:
– Мончаш пураш пеш йӧратем, а тушто выньык деч посна нигузеат! Тумо, лӱмегож выньык келша. Жап лийме семын оласе але Медведево посёлкысо мончаш миенак толаш тыршем.
Советский районыш оньыкувам деке мийымем годым кажне кеҥежым выньыкашым налына.
Йошкар-Олаште илем гынат, тудым ямдылем, подвалыштем кызытат икмыняр мужыр кеча.
Галина ЯКУШЕВА, мурызо:
– Кодшо кечылаште Пошкырт кундем да Екатеринбург ола гыч унам-шамыч лийыныт. Мончаш олтымеке, нунылан лӱмынак свежа выньыкым ямдыленна. Пеш келшен. А телылан Петро эртымеке, тошто тылзе годым выньыкашым налаш тыршена, иктаж кумло наре мужырым ямдылена. Куэ укшла коклаш пызле воштырым, пӱртньыкым пыштена, тумо выньыкымат посна ыштена.
Мончаште капкылым кырыме годым шокшо выньыкын паржым шӱлен шинчем, тидыже вӱдашат пайдале, вӱдшымат йӱына, пеш тамле.
Мончаште выньык дене кырыме годым паваемын ойлен кодымо шомакшым пелештем: «77 воштыр дене шке ӱмбачем еҥын шинча вочмыжым, осал шонымашыжым, черым кырен луктам. Осалже кайыже, сайже толжо…»
Александр БИРЮКОВ, Марий юмынйӱла ушем вуйлатыше:
– Кугурак-влакын ойлымышт почеш выньыкым Петро деч вара налыныт. А кызыт ончыкырак шуэш да июль тӱҥалтыштак ямдылат. Выньыклан укшлам самырык, лопкарак лышташан куэ гыч налыт. Меат кажне мончаш мужыр выньыкым пуртена, садлан телылан шукак ямдылена.
Выньыкым погымо годым коклашкыже писте укшым пыштена, тумо гыч посна ыштена. Нулго, лӱмегож выньыкым монча кечын налына. Тамле пуш лекше манын, мончаш тӱрлӧ шудым: арымшудым, вӱршудым – пуртена, нунын деч ямдылыме вӱдшӧ йӱашат, капым шӱялташат пеш сай.
Выньык дене кырыме годым тыге пелештена: « Монча кува-кугыза, лывырге выньыкет дене, шокшо парет дене, яндар вӱдет дене осалжым, страмжым, шинча вочмым почкын, шӱялтен луктын колтыза. Капкылем лывырге лийже, йолем кушко шона, тушко наҥгайыже, могырем каныже».
А.БАЙКОВА
Авторын фотожо
