КУЛЬТУР ДА ИСКУССТВО

КОРНЫМ ПОЧЫН КОМСОМОЛ

Тений Марий областной комсомол организацийын 100 ияш лӱмгечыже республикыштына кумдан палемдалте. Пайрем шеҥгелан кодо гынат, юбилей вашеш лукмо чапле книга дене тендам палдарыде нигузе ок лий. Тиде книга-альбом Совет Ушем жапысе ВЛКСМ-ын эртыме корныжо, факт-влак, ончыл радамыште шогышо комсомолец-влакын илышышт, подвигышт да пашашт нерген каласкалыше савыктыш. Кермыч наре нелытан, комжо да кӧргыжат йошкар тӱс дене келыштарыме, содержаний могырым ончалаш гын – историй! Моткоч шуко фотографийым да документым пуртымо, тидыже книгам шкешотан научо-исторический да публицистический изданий семын аклаш амалым пуа.

Проектын авторжо да вуйлатышыже – С.И.Шареев, тудо шкежат 1983-1985 ийлаште Марий комсомол обкомын икымше секретарьже лийын, кызыт «Марий Эл Республикысе комсомол ветеран-влак» мер ушемым вуйлата. Книгам чылаже 13 ужашлан шелме. Тӱрлӧ ийлаште Марий ВЛКСМ обкомым  вуйлатыше-влакын: Юрий Буйлинын (1966-1974), Юрий Ерофеевын (1974-1977), Римма Катаеван (1972-1977 ийлаште пионер организаций-влакын областной советыштын председательже),  Леонид Гаранинын (1979-1983), Евгений Эпинын (1886-1988), Михаил Калиновын (1989-1990),  Юрий Андриановын (1990-1991), Сергей Лоскутовын (1991-1992) – шарнымашышт самырык тукымлан ончыкыжым историйым шымлымаште негыз семын лийын кертыт.

Книган кажне ужашыже посна темым авалта, мутлан, Марий Элысе студотрядлан 55 ий теммылан («Смелый, задорный народ боевой»), «Молодой коммунист» газетлан («Шелест страниц, как шелест знамен»), Марий пионерийлан («Честное пионерское»), Молодёжь да студент-влакын всемирный фестивальыштлан («Парят над планетой голуби мира») пӧлеклалтыныт. «Марий Эл Республикысе комсомол ветеран-влакын ушемын» районласе филиалыштым  вуйлатышышт-влакын возымо статьяшт ту пагытыш пӧртылтат.

«Самырык-влак дене ик радамыште» ужашыште комсомолец-поэт да комсомол нерген возышо-влакын почеламутыштым  пуртымо, нунын коклаште –  марий сылнымут мастар Олык Ипай, Шадт Булат, Валентин Колумб, Семен Николаев, Анатолий Тимиркаев, Николай Егоров да молат.

Книга «2013–2025 ийлан Марий Эл Республикын кугыжаныш национальный политикыже» кугыжаныш программе дене келшын лектын. Тӱҥ редактор, автор – журналист, писатель В.Э.Мальцев. Редакционный коллегийыште Ю.А.Буйлин, Р.Г.Катаева, И.В.Петров, В.Ю.Полубарьева, С.И.Шареев тыршеныт.

Л.СЕМЕНОВА

 

Опубликовать в Одноклассники

Добавить комментарий